जळगाव प्रतिनिधी | शहरातील खोटे नगर परिसरातील हॉटेल आशीर्वाद जवळ एका २६ वर्षीय तरुणीवर बलात्काराचा प्रयत्न करून तिला बेदम मारहाण केल्याची संतापजनक घटना समोर आली आहे. याप्रकरणी जळगाव तालुका पोलीस ठाण्यात संशयित आरोपीविरुद्ध गुन्हा दाखल करण्यात आला असून पोलीस त्याचा शोध घेत आहेत.
मिळालेल्या माहितीनुसार, तक्रारदार तरुणी ही खासगी नोकरी करते. १० एप्रिल रोजी रात्री १० वाजेच्या सुमारास संशयित आरोपी भागवत गोविंद चव्हाण (रा. वाघ नगर, जळगाव) याने पीडितेस खोटे नगर परिसरातील एका निर्जन स्थळी असलेल्या काटेरी झुडपात नेले. “तू मला खूप आवडतेस” असे म्हणत आरोपीने पीडितेला मिठी मारून अश्लील चाळे करण्यास सुरुवात केली. पीडितेने या कृत्यास विरोध केला असता, आरोपीने तिला जमिनीवर पाडून विवस्त्र करण्याचा प्रयत्न केला.
पीडितेने हिमतीने प्रतिकार सुरूच ठेवल्याने संतापलेल्या आरोपी भागवत चव्हाण याने तिला लाथाबुक्क्यांनी पोटात, पाठीवर, डोळ्यावर आणि गालावर बेदम मारहाण केली. एवढ्यावरच न थांबता, आरोपीने पीडितेचा ‘रेडमी नार्झो एन ५३’ कंपनीचा मोबाईल फोन आणि तिची महत्त्वाची शैक्षणिक कागदपत्रे हिसकावून घेऊन घटनास्थळावरून पळ काढला.
या घटनेनंतर पीडितेने जळगाव तालुका पोलीस ठाण्यात धाव घेऊन तक्रार नोंदवली. पोलिसांनी आरोपीविरुद्ध गुन्हा दाखल केला आहे. या प्रकरणाचा पुढील तपास पोलीस उपनिरीक्षक विजय देवराम पाटील हे करत आहेत.
