धरणगाव प्रतिनिधी | बेकायदेशीर शस्त्र बाळगणाऱ्यांविरुद्ध धरणगाव पोलिसांनी मोठी कारवाई केली असून, गिरणा नदीच्या पात्रातून एका संशयिताला गावठी बनावटीच्या पिस्तूलसह रंगेहाथ अटक केली आहे. या कारवाईमुळे परिसरात अवैध शस्त्र बाळगणाऱ्यांचे धाबे दणाणले आहेत.
मिळालेल्या माहितीनुसार, गुरुवारी १४ मे रोजी सायंकाळी ४:३० वाजेच्या सुमारास धरणगाव शिवारातील गिरणा नदीच्या पात्रात एक व्यक्ती संशयास्पदरीत्या वावरत असल्याची गोपनीय माहिती धरणगाव पोलिसांना प्राप्त झाली होती. माहिती मिळताच पोलिसांनी विलंब न करता पथक तयार करून संबंधित परिसरात सापळा रचला. पोलिसांची चाहूल लागताच पळून जाण्याच्या प्रयत्नात असलेल्या संशयिताला पथकाने शिताफीने ताब्यात घेतले.
आरोपीची कसून झडती घेतली असता, त्याच्याकडे २५ हजार रुपये किमतीचे एक लोखंडी सिल्व्हर रंगाचे गावठी बनावटीचे पिस्तूल मिळून आले. पोलिसांनी आरोपी आनंदा बळीराम सपकाळे (वय ३९, रा. सिद्धार्थ नगर, आव्हाणे, ता. जळगाव) याला अधिक विचारपूस केली असता, सदर शस्त्र बाळगण्याचा कोणताही परवाना त्याच्याकडे नसल्याचे निष्पन्न झाले. यानंतर पोलिसांनी तातडीने मुद्देमाल जप्त करून आरोपीला अटक केली.
या प्रकरणी पोलीस कॉन्स्टेबल ज्ञानेश्वर नथ्थू सपकाळे यांच्या फिर्यादीवरून आरोपीविरुद्ध धरणगाव पोलीस ठाण्यात गुन्हा दाखल करण्यात आला आहे.
