जळगाव प्रतिनिधी | शहरातील अत्यंत वर्दळीचा परिसर म्हणून ओळखल्या जाणाऱ्या रामानंदनगर भागातील गिरणा टाकी ते चर्च दरम्यान रात्रीच्या सुमारास एक ‘हिट अँड रन’चा थरारक प्रकार समोर आला आहे. एका अवघ्या १५ वर्षांच्या अल्पवयीन मुलाने चालवलेल्या भरधाव कारने रस्त्यावरील तब्बल ९ जणांना जोरदार धडक दिली. या भीषण अपघातात दोन दाम्पत्यांसह एक तरुण, असे एकूण पाच जण गंभीर जखमी झाले असून परिसरात एकच खळबळ उडाली आहे.
प्राथमिक माहितीनुसार, संबंधित अल्पवयीन कारचालकाचे कारवरील नियंत्रण अचानक सुटले. नियंत्रण सुटल्यामुळे भरधाव वेगाने जाणाऱ्या या कारने रस्त्यावरून जाणाऱ्या नागरिकांना आणि वाहनांना एकापाठोपाठ एक अशी जोरदार धडक दिली. यामध्ये एका इलेक्ट्रिक दुचाकीवरून जाणाऱ्या तरुणालाही कारने उडवले, ज्याच्या पायाला गंभीर दुखापत झाली आहे. या अपघाताचा आवाज आणि जखमींचा आक्रोश ऐकून परिसरातील नागरिकांनी घटनास्थळाकडे धाव घेतली. त्यामुळे काही काळ या ठिकाणी कमालीचा गोंधळ आणि भीतीचे वातावरण निर्माण झाले होते.
अपघातानंतर संतप्त झालेल्या नागरिकांच्या भीतीने अल्पवयीन कारचालक आपली कार घटनास्थळीच सोडून अंधाराचा फायदा घेत फरार झाला.
जखमींना तात्काळ उपचारासाठी जवळच्या खाजगी रुग्णालयात दाखल करण्यात आले असून, त्यांच्यावर उपचार सुरू आहेत.
विशेष म्हणजे, एवढी मोठी आणि गंभीर घटना घडूनही रात्री उशिरापर्यंत या प्रकरणी पोलीस ठाण्यात कोणतीही अधिकृत नोंद करण्यात आली नव्हती. मात्र, घटनेची गांभीर्य लक्षात घेता पोलिसांनी या प्रकरणाची दखद घेतली असून, फरार झालेल्या अल्पवयीन कारचालकाचा शोध सुरू केला आहे. या घटनेमुळे शहरात अल्पवयीन मुलांच्या हाती वाहने देणाऱ्या पालकांच्या बेजबाबदारपणावर पुन्हा एकदा प्रश्नचिन्ह उपस्थित होत आहे.
