भुसावळ प्रतिनिधी | शहरालगत असलेल्या झेडटीआरआय बोगद्याजवळील मंदिरातील मुख्य पुजाऱ्याची अज्ञात हल्लेखोरांनी निर्घृण हत्या केल्याची धक्कादायक घटना सोमवारी २९ जून सकाळी उघडकीस आली. या घटनेमुळे भुसावळ शहरासह परिसरात एकच खळबळ उडाली असून पोलिसांनी अज्ञात आरोपींविरोधात खुनाचा गुन्हा दाखल करून तपासाची चक्रे वेगाने फिरवली आहेत.
संतोष रघुवीर मंचल (वय ५५, रा. झेडटीआरआय परिसर, भुसावळ) असे मृत पुजाऱ्याचे नाव आहे. ते आरपीडी मार्गालगत लष्करी डेपोपासून सुमारे एक किलोमीटर अंतरावरील तीन मंदिरांमध्ये अनेक वर्षांपासून नियमित पूजा-अर्चा करत होते.
सोमवारी सकाळी त्यांच्या कुटुंबीयांनी मंदिरात भेट दिली असता संतोष मंचल यांचा रक्ताच्या थारोळ्यात पडलेला मृतदेह आढळून आला. त्यांच्या डोक्यावर जड वस्तूने वार करण्यात आल्याचे प्रथमदर्शनी दिसून आले. ही माहिती मिळताच परिसरातील नागरिकांनी मोठी गर्दी केली आणि तातडीने भुसावळ शहर पोलिसांना माहिती देण्यात आली.
घटनेची माहिती मिळताच पोलीस उपअधीक्षक केदार बारबोले, पोलीस निरीक्षक महेश गायकवाड व अन्य अधिकारी घटनास्थळी दाखल झाले. पंचनामा करून मृतदेह शवविच्छेदनासाठी रुग्णालयात पाठविण्यात आला.
दरम्यान, खून नेमका कोणत्या कारणातून झाला, याबाबत अद्याप स्पष्टता आलेली नाही. चोरी, वैयक्तिक वैमनस्य किंवा इतर कोणत्या कारणातून हा प्रकार घडला का, याचा सर्व बाजूंनी तपास सुरू आहे. ठसेतज्ज्ञ व फॉरेन्सिक पथकाने घटनास्थळावरून महत्त्वाचे पुरावे गोळा केले असून संशयितांचा शोध घेण्यासाठी पोलिसांची विशेष पथके रवाना करण्यात आली आहेत.
