धरणगावात बेकायदेशीर वास्तव्यास असलेली इराणी महिलेची होणार हकालपट्टी
धरणगाव येथे गेल्या वर्षभरापासून बेकायदेशीररीत्या वास्तव्यास असलेल्या इराणी महिला फरनाज हमीद रेझा (वय ३८) आणि तिच्या मुलाची भारतातून इराण येथे हकालपट्टी केली जाणार आहे. दि. ५ फेब्रुवारी रोजी जळगाव येथून दिल्लीला रेल्वेने, तर दि. ६ फेब्रुवारी रोजी दिल्ली येथून विमानाने इराणला त्यांना रवाना करण्यात येणार आहे. यासाठी दोघांची विमान तिकिटेही काढण्यात आली आहेत.
मिळालेल्या माहितीनुसार, धरणगाव येथील कुरेशी मोहल्ल्यात सदर इराणी महिला आपल्या मुलासह गेल्या एक वर्षापासून वास्तव्यास होती. याबाबतची माहिती धरणगाव पोलिसांना मिळाल्यानंतर त्यांनी कुरेशी मोहल्ल्यातील एका घरातून महिलेला ताब्यात घेतले. या प्रकरणात त्या महिलेला बेकायदेशीर आश्रय देणाऱ्यांविरुद्ध गुन्हा दाखल करण्यात आला असून दोघांना अटक करण्यात आली आहे. तर संबंधित इराणी महिलेला जळगाव येथील शासकीय आशादीप महिला वसतिगृहात ठेवण्यात आले होते.
बेकायदेशीर वास्तव्यास असलेल्या या महिलेसह तिच्या मुलाला दि. ६ रोजी दिल्ली येथून विमानाने इराणला पाठविले जाणार आहे. त्यापूर्वी दि. ५ रोजी जळगाव स्थानिक गुन्हे शाखेचे (एलसीबी) पथक महिलेला रेल्वेने दिल्लीला घेऊन जाणार आहे. इमिग्रेशन प्रक्रिया पूर्ण होईपर्यंत एलसीबीचे पथक तिच्यासोबत राहणार आहे.
या प्रकरणात चौकशी केल्यानंतर जिल्हा पोलिस दलाने इराण दूतावासाशी संपर्क साधून संपूर्ण माहिती दिली. यानंतर झालेल्या चर्चेनंतर इराण दूतावासाने महिलेला परत बोलाविण्याबाबत सकारात्मक भूमिका घेतली असून परतीचे विमान तिकीटही दूतावासाने उपलब्ध करून दिले आहे. दरम्यान, सदर इराणी महिलेला केवळ फारसी व थोडीफार इंग्रजी भाषा येत असल्याने चौकशी करताना पोलिसांना अडचणींचा सामना करावा लागला. त्यामुळे स्थानिक गुन्हे शाखेचे पोलिस निरीक्षक राहुल गायकवाड व त्यांच्या सहकाऱ्यांनी ट्रान्सलेटरच्या मदतीने महिलेकडून आवश्यक माहिती घेतली.
