शेअर मार्केटच्या आमिषातून तरुणीची १० लाखांची फसवणूक;
भुसावळ शहरातील एका परिसरात राहणाऱ्या २७ वर्षीय तरुणीची शेअर मार्केटमध्ये आर्थिक फायदा करून देण्याचे आमिष दाखवून तब्बल १० लाख रुपयांची फसवणूक केल्याचा गंभीर प्रकार उघडकीस आला आहे. या प्रकरणात आर्थिक फसवणुकीसह लग्नासाठी दबाव, पाठलाग, घरात घुसून चाकूचा धाक दाखवत विनयभंग, तसेच अश्लील फोटो मॉर्फ करून बदनामीची धमकी दिल्याचा आरोप पीडितेने केला आहे. या प्रकरणी गुन्हा दाखल करण्यात आला असून पोलिसांनी संशयित आरोपी सिद्धान्त मनोज हेडा याला अटक केली असून न्यायालयाने त्याला सहा दिवसांची पोलिस कोठडी सुनावली आहे.
संशयित आरोपी सिद्धान्त मनोज हेडा (रा. गंगाराम प्लॉट, भुसावळ) याने पीडित तरुणीशी असलेल्या ओळखीचा गैरफायदा घेत शेअर मार्केटमध्ये गुंतवणूक केल्यास मोठा नफा मिळेल, असे सांगून तिच्या डिमॅट अकाउंटची माहिती घेतली. त्यानंतर त्या अकाउंटमधून तसेच क्रेडिट कार्डचा वापर करून आरोपीने सुमारे १० लाख रुपये लंपास केल्याचे तक्रारीत नमूद आहे. आर्थिक फसवणुकीनंतर आरोपीने पीडितेवर लग्नासाठी दबाव टाकला. तिने नकार दिल्यानंतर आरोपीने मुंबई ते मंगलोरपर्यंत तिचा पाठलाग केला. पुढे तिच्या घरात घुसून तोंड दाबत चाकूचा धाक दाखवून विनयभंग केला आणि पालकांना जीवे मारण्याची धमकी दिल्याचा आरोप आहे. तसेच पीडितेचे वैयक्तिक फोटो मॉर्फ करून ते इंटरनेटवर प्रसारित करण्याची आणि कुटुंबातील व्यक्तींची बदनामी करण्याची धमकी देत इन्स्टाग्राम व व्हॉट्सअॅपवरून सतत संदेश पाठवून मानसिक त्रास दिला.
हे फोटो व डेटा डिलीट करण्यासाठी आरोपीने पुन्हा १० लाख रुपयांची खंडणी मागितल्याचेही तक्रारीत नमूद आहे. या प्रकरणी भुसावळ बाजारपेठ पोलिस ठाण्यात गुन्हा दाखल करण्यात आला असून पुढील तपास पोलीस निरीक्षक राहुल वाघ करीत आहेत. या घटनेमुळे शहरात खळबळ उडाली आहे .
