दगडफेक, वाहनांची तोडफोड : बकऱ्यांच्या व्यवहारातून दोन गटात तुफान हाणामारी
दोन गट आमनेसामने येत तुफान राडा झाल्याची घटना समोर आली आहे
छत्रपती संभाजीनगर जिल्ह्यातील सिल्लोड तालुका अंतर्गत अंभई गावात काल मध्यरात्री दोन गट आमनेसामने येत तुफान राडा झाल्याची घटना समोर आली आहे. बकऱ्यांच्या व्यवहारातून वाद उफाळल्याने दोन गटात मारामारी झाली असून या हाणामारीत ५ ते ६ जण गंभीर जखमी झाले आहेत. तसेच पोलिसांनी तातडीने कारवाई करून १५ जणांना ताब्यात घेऊन गुन्हा दाखल केला आहे.
मिळालेल्या माहितीनुसार, बकऱ्यांच्या व्यवहारातून सुरू झालेला वाद हळूहळू चिघळला आणि त्यानंतर दोन्ही गटांमध्ये जोरदार घोषणाबाजी व दगडफेक झाली. या वादाला पुढे राजकीय स्वरूपही प्राप्त झाल्याचे सांगितले जात आहे. एकनाथ शिंदे यांच्या शिवसेनेचे समर्थक आणि भाजप कार्यकर्ते असे दोन गट समोरासमोर आल्याची माहिती मिळत आहे.
या राड्यात जमावाने तब्बल १५ ते २० वाहनांची तोडफोड केली. या घटनेचा व्हिडिओ सोशल मीडियावर व्हायरल होत आहे. या घटनेवेळी सुमारे ५०० ते ६०० लोकांचा जमाव गावात जमला होता. परिस्थिती तणावपूर्ण झाल्याने पोलिसांनी तत्काळ घटनास्थळी धाव घेत गावात तळ ठोकला. या घटनेत ५ ते ६ जण जखमी झाले असून त्यापैकी दोघांची प्रकृती गंभीर आहे.
गंभीर जखमींना पुढील उपचारासाठी छत्रपती संभाजीनगर येथे हलवण्यात आले आहे. या मारहाणी प्रकरणानंतर गावात तणावपूर्ण वातावरण निर्माण झाले आहे. दरम्यान, मध्यरात्री १२ वाजण्याच्या सुमारास पोलिसांनी कारवाई करत १५ जणांना ताब्यात घेतले आहे. सध्या गावात मोठा पोलिस बंदोबस्त तैनात असून परिस्थिती नियंत्रणात असल्याची माहिती पोलिसांकडून देण्यात आली आहे.
