भारतात एलपीजी सिलिंडरच्या किमती वाढल्या आहेत.
जळगाव । मध्य पूर्वेतील सुरू असलेल्या युद्धाचा आता भारतावरही परिणाम होत आहे. भारतात एलपीजी सिलिंडरच्या किमती वाढल्या आहेत. सरकारी तेल कंपन्यांनी १४.२ किलोच्या घरगुती एलपीजी सिलिंडरच्या किमतीत ६० रुपये आणि १९ किलोच्या व्यावसायिक एलपीजी सिलिंडरच्या किमतीत ११५ रुपयांनी वाढ केली आहे. नवे दर आज म्हणजेच ७ मार्चपासून लागू होतील.
जळगावला ८५८.५० रुपयांत मिळणारे स्वयंपाकाच्या गॅसचे सिलिंडर आता ९१८.५० रुपयांना मिळेल. यामुळे पुन्हा सर्वसामान्यांच्या खिशाला झळ पोहोचणार आहे. दिल्लीत घरगुती सिलिंडरची किंमत ८५३ रुपयांवरून ९१३ रुपये होईल. तर, व्यावसायिक सिलिंडरची किंमत आता १,७६४ रुपयांवरून १८८३ रुपये होईल.घरगुती एलपीजी सिलिंडरची किंमत शेवटच्या वेळी ८ एप्रिल २०२५ रोजी ५० रुपयांनी वाढवण्यात आली होती. तेव्हापासून किमती स्थिर होत्या. व्यावसायिक एलपीजी सिलिंडरची किंमत गेल्या महिन्यात १ फेब्रुवारी रोजीच ५० रुपयांनी वाढवण्यात आली होती.
दरम्यान, अमेरिका आणि इस्रायलने इराणवर केलेल्या हल्ल्यांनंतर आंतरराष्ट्रीय बाजारपेठेत तेल आणि गॅसच्या किमतींबाबत चिंता वाढली आहे. परिणामी, भारतात एलपीजीच्या किमती वाढल्या असून पेट्रोलच्या दरात वाढ होण्याची भीती व्यक्त केली जात आहे. सरकारी आकडेवारीनुसार, भारत आपल्या एलपीजी गरजांचा मोठा भाग आयातीद्वारे पूर्ण करतो. गेल्या आर्थिक वर्षात, देशाचा एकूण एलपीजी वापर अंदाजे ३१.३ दशलक्ष टन होता. तथापि, या एलपीजीपैकी फक्त १२.८ दशलक्ष टन देशांतर्गत उत्पादन झाले. उर्वरित गरजा पूर्ण करण्यासाठी, भारताला आखाती देशांसह इतर अनेक आंतरराष्ट्रीय बाजारपेठांमधून गॅस आयात करावा लागला.
