नशिराबाद पोलीस स्टेशनचा पदभार स्वीकारला आहे.
जळगाव । नशिराबाद (ता. जळगाव) येथील पोलीस स्टेशनमध्ये सहाय्यक पोलीस निरीक्षक (API) म्हणून योगिता मधुकर नारखेडे यांची नियुक्ती करण्यात आली आहे. अलीकडेच झालेल्या पोलीस खात्यातील प्रशासकीय बदलांतर्गत ही नियुक्ती करण्यात आली असून त्यांनी नशिराबाद पोलीस स्टेशनचा पदभार स्वीकारला आहे.
API योगिता नारखेडे या कर्तव्यदक्ष, शिस्तप्रिय व संवेदनशील अधिकारी म्हणून ओळखल्या जातात. यापूर्वी त्यांनी विविध ठिकाणी सेवा बजावताना कायदा व सुव्यवस्था राखणे, गुन्हेगारी नियंत्रण, महिलांसाठी सुरक्षितता तसेच जनतेशी समन्वय साधून काम करण्यावर भर दिला आहे.
नशिराबाद पोलीस स्टेशन हद्दीत कायदा-सुव्यवस्था अबाधित ठेवणे, वाढत्या गुन्हेगारीला आळा घालणे, अवैध धंद्यांवर कठोर कारवाई करणे आणि सर्वसामान्य नागरिकांना त्वरित व न्याय्य दिलासा देणे, हा त्यांच्या कामाचा प्रमुख उद्देश राहणार आहे. विशेषतः महिलांच्या सुरक्षिततेसाठी कडक भूमिका, गुन्हेगारांवर झिरो टॉलरन्स आणि पोलीस-जनता संबंध अधिक मजबूत करण्यावर त्यांचा भर राहील, अशी अपेक्षा व्यक्त केली जात आहे.
API योगिता नारखेडे यांच्या नियुक्तीचे नशिराबाद परिसरात स्वागत होत असून, त्यांच्या नेतृत्वाखाली पोलीस स्टेशनची कार्यक्षमता वाढेल आणि नागरिकांना सुरक्षिततेचा अधिक विश्वास मिळेल, असा विश्वास स्थानिक नागरिकांकडून व्यक्त केला जात आहे.
