जळगाव प्रतिनिधी । जळगाव शहरातील अतिक्रमण निर्मूलन मोहिमेला जळगाव महानगरपालिकेने गुरुवारी नवी उंची गाठली. पालिकेच्या अतिक्रमण विभागाच्या पथकाने सुप्रीम कॉलनी ते जळगाव टोल नाका या महामार्गावर धडक कारवाई करताना १७ मांस विक्रेते व ९ ढाबे जमीनदोस्त केले. तसेच बेकायदेशीर व्यवसायात वापरण्यात येणाऱ्या १२ गाड्या जप्त करण्यात आल्या.
गेल्या महिन्याभरापासून पालिकेने शहरातील विविध भागांत अतिक्रमण विरोधी मोहीम राबविली आहे. यापूर्वी इच्छादेवी चौक, अजिंठा चौक, आकाशवाणी चौक ते खोटे नगर तसेच अजिंठा चौक ते एमआयडीसी पोलीस स्टेशन परिसरातील अतिक्रमण हटविण्यात आले होते. आजची कारवाई ही त्याच मोहिमेचा एक भाग आहे.
विशेष म्हणजे, गेल्या अनेक महिन्यांपासून या महामार्गावर विनापरवाना मांस विक्री आणि छोटे-मोठे ढाबे सुरू होते. यामुळे वाहतुकीस अडथळा निर्माण होत असल्याच्या नागरिकांच्या तक्रारी होत्या. या कारवाईनंतर स्थानिक नागरिकांनी पालिकेच्या कारवाईचे स्वागत केले आहे.
अतिक्रमण विभागाचे अध्यक्ष संजय ठाकूर यांनी यावेळी स्पष्ट इशारा दिला की, “पुन्हा कोणीही बेकायदेशीरपणे दुकाने उभारण्याचा प्रयत्न केला, तर दंडात्मक व अधिक तीव्र कारवाई केली जाईल.” पालिकेने पुढील दिवसांत शहरातील अन्य भागांतही अशाच प्रकारची मोहीम राबविण्याचे संकेत दिले आहेत.
