चाळीसगाव प्रतिनिधी । उसने दिलेले पैसे परत मागणे एका तरुण शेतकऱ्याला महागात पडले असून, दोन जणांनी त्याला बेदम मारहाण केल्याची घटना पिंपरखेड येथे घडली आहे. याप्रकरणी चाळीसगाव ग्रामीण पोलीस ठाण्यात गुन्हा नोंदवण्यात आला आहे.
मिळालेल्या माहितीनुसार, अविनाश शरद अहिरे (वय २२) याने संशयित आरोपी सचिन धोंडू अहिरे याला घरगुती कामासाठी पैसे दिले होते. ३० एप्रिल रोजी अविनाशने आपल्या हक्काचे पैसे परत मागितले असता, आरोपी सचिन आणि त्याचा साथीदार सागर दीपक जाधव यांनी वाद उकरून काढला. वादाचे रूपांतर हाणामारीत झाले असून, संशयितांनी अविनाशचा हात पिरगळून त्याला गंभीर दुखापत केली. “पैसे देणार नाही, काय करायचे ते कर,” अशी धमकी देत दोघांनी पलायन केले. पोलिसांनी याप्रकरणी मारहाणीचा गुन्हा दाखल केला असून पुढील तपास सुरू आहे.
