अमळनेर प्रतिनिधी । अमळनेर तालुक्यातील राष्ट्रीय महामार्ग क्र. ६ वर डंगर बुद्रुक ते चोपडाई दरम्यान मंगळवारी १३ मे रोजी सायंकाळी ७:१५ वाजेच्या सुमारास एका भीषण अपघाताचा थरार पाहायला मिळाला. भरधाव वेगाने येणाऱ्या एका कारने दुचाकीला समोरासमोर धडक दिल्याने दुचाकीस्वार शिवाजी भगवान सैंदाणे हे जागीच गंभीर जखमी झाले आणि नंतर त्यांचा मृत्यू झाला. या घटनेने परिसरात एकच खळबळ उडाली असून महामार्गावरील सुरक्षेचा प्रश्न पुन्हा ऐरणीवर आला आहे.
याबाबत अधिक माहिती अशी की, शिवाजी सैंदाणे (रा. कोडावळ) हे डंगर बुद्रुककडून आपल्या दुचाकीने (एमएच १९ बीएफ ०५८८) जात असताना, धुळ्याकडून येणाऱ्या किआ सोनेट कारने (एमएच १९ ईजी ०५८८) त्यांना जोरदार धडक दिली. धडक इतकी भीषण होती की शिवाजी सैंदाणे हे हवेत अनेक फूट उडून रस्त्यावर आदळले. त्यांच्या डोक्याला आणि छातीला गंभीर मार लागल्याने मोठ्या प्रमाणावर रक्तस्त्राव झाला. स्थानिक नागरिकांनी प्रसंगावधान राखून त्यांना तात्काळ वाहनाची व्यवस्था करून धुळे येथील रुग्णालयात हलवले.
रुग्णालयात पोहोचण्यापूर्वीच शिवाजी यांची प्राणज्योत मालवली होती. डॉक्टरांनी तपासणी अंती त्यांना मृत घोषित केले. या घटनेची माहिती मिळताच अमळनेर पोलीस घटनास्थळी दाखल झाले. अपघातामुळे महामार्गावरील वाहतूक काही काळ विस्कळीत झाली होती. पोलिसांनी अपघातग्रस्त वाहने बाजूला करून रस्ता मोकळा केला. मयताचे भाऊ शंभू सैंदाणे यांनी दिलेल्या फिर्यादीवरून कार चालकावर गुन्हा दाखल करण्यात आला आहे. पोलीस आता या प्रकरणाचा सखोल तपास करत असून फरार चालकाचा शोध घेतला जात आहे.
