जळगाव प्रतिनिधी । स्थानिक राजकारणाचे आणि सहकार क्षेत्राचे प्रमुख केंद्र असलेल्या जळगाव येथील कृषी उत्पन्न बाजार समितीच्या सभापतीपदाचा पेच अखेर आज सुटला आहे. बाजार समितीच्या रिक्त असलेल्या सभापतीपदासाठी आज विशेष निवड प्रक्रिया अत्यंत उत्साहात राबविण्यात आली. या अत्यंत महत्त्वाच्या निवडणुकीत लक्ष्मण गंगाराम पाटील उर्फ लकी टेलर यांची सभापतीपदी बिनविरोध निवड करण्यात आली आहे. या निवडीमुळे गेल्या काही दिवसांपासून जळगावच्या बाजार समितीमध्ये सुरू असलेल्या राजकीय घडामोडींना आता पूर्णविराम मिळाला असून, नवनिर्वाचित सभापतींच्या समर्थकांमध्ये आनंदाचे वातावरण पसरले आहे.
सोमवारी १८ मे रोजी सकाळी ठीक ११ वाजता कृषी उत्पन्न बाजार समितीच्या मुख्य सभागृहात या निवडणूक प्रक्रियेला सुरुवात झाली. पीठासीन अधिकाऱ्यांच्या देखरेखीखाली ही प्रक्रिया पार पडली. निर्धारित वेळेत लकी टेलर यांच्या नावाचा एकमेव अर्ज दाखल झाल्याने, त्यांची निवड बिनविरोध झाल्याची अधिकृत घोषणा करण्यात आली. या ऐतिहासिक प्रसंगी जळगावचे आमदार राजूमामा भोळे, आमदार मंगेश चव्हाण, जिल्हा बँकेचे चेअरमन संजय पवार, तसेच माजी सभापती सुनील महाजन यांच्यासह जिल्ह्यातील सहकार क्षेत्रातील अनेक प्रमुख मान्यवर आणि लोकप्रतिनिधी मोठ्या संख्येने उपस्थित होते.
बाजार समितीच्या या नव्या राजकीय समीकरणाला गेल्या काही दिवसांपूर्वी नाट्यमय वळण आले होते. बाजार समितीच्या तब्बल १२ संचालकांनी तत्कालीन सभापती सुनील महाजन यांच्याविरोधात थेट अविश्वासाचा ठराव आणला होता. या राजकीय पेचप्रसंगानंतर सुनील महाजन यांनी नैतिक जबाबदारी स्वीकारत आपल्या सभापतीपदाचा तडकाफडकी राजीनामा दिला होता. महाजन यांच्या राजीनाम्यामुळे हे महत्त्वपूर्ण पद रिक्त झाले होते. तेव्हापासून जळगाव बाजार समितीचा कारभार कोण हाकणार, याकडे संपूर्ण जिल्ह्याचे लक्ष लागून राहिले होते. आज झालेल्या या बिनविरोध निवडीमुळे बाजार समितीच्या पुढील कारभाराचा मार्ग सुकर झाला आहे. नवनिर्वाचित सभापती लकी टेलर यांनी सर्व संचालकांना सोबत घेऊन शेतकऱ्यांच्या हिताचे निर्णय घेणार असल्याचे यावेळी स्पष्ट केले.
