जळगाव प्रतिनिधी । आगामी २१ जून रोजी साजरा होणाऱ्या ‘जागतिक योगदिवसा’चे औचित्य साधून यंदा जळगाव जिल्ह्यात केवळ एक दिवस नव्हे, तर पूर्ण ‘योगसप्ताह’ साजरा करण्याचा महत्त्वपूर्ण निर्णय महाराष्ट्र योगशिक्षक संघाच्या बैठकीत घेण्यात आला आहे. जळगाव जिल्हा कार्यकारिणीची ही ऑफलाइन बैठक रविवार १७ मे २०२६ रोजी संध्याकाळी ६ वाजता जिल्हाध्यक्षा चित्रा महाजन यांच्या निवासस्थानी उत्साहात पार पडली.
या बैठकीत मार्गदर्शन करताना महाराष्ट्र योगशिक्षक संघाचे राज्य कार्यकारी अध्यक्ष प्रा. डॉ. कृणाल महाजन यांनी ‘योगसप्ताह’ साजरा करण्याची अभिनव संकल्पना मांडली. या सप्ताहाच्या माध्यमातून योगाचा प्रसार घराघरांत पोहचवण्यासाठी विविध स्पर्धात्मक कार्यक्रमांचे आयोजन करण्याचे आवाहन त्यांनी केले. त्यानुसार या योगसप्ताहात चित्रकला स्पर्धा, योगासन स्पर्धा, योगनृत्य स्पर्धा, योगगीत स्पर्धा, सूत्रपठण स्पर्धा आणि सद्यस्थितीत लोकप्रिय असलेल्या ‘रिल्स् स्पर्धा’ अशा एकूण ६ वेगवेगळ्या स्पर्धा घेण्याचे निश्चित करण्यात आले आहे.
या स्पर्धांमधील पहिल्या तीन विजेत्यांना जागतिक योगदिनाच्या मुख्य कार्यक्रमात (२१ जून) प्रमाणपत्र आणि एकूण ४० हजार रुपयांपर्यंतची रोख पारितोषिके देऊन सन्मानित करण्यात येणार आहे. स्पर्धांच्या नियोजनासाठी विशेष समित्यांची नियुक्ती करण्यात आली असून, अनुपस्थित पदाधिकाऱ्यांनाही यात जबाबदारी दिली जाणार आहे.
बैठकीत उत्तर महाराष्ट्र विभाग प्रमुख श्री. सुनील गुरव आणि जिल्हाध्यक्षा सौ. चित्रा महाजन यांनीही उपस्थितांना मार्गदर्शन केले. हा योगसप्ताह यशस्वी करण्यासाठी जिल्हा समितीच्या सर्व सदस्यांनी कटिबद्धतेचे आश्वासन दिले. या सप्ताहाचे सविस्तर वेळापत्रक आणि स्थळ लवकरच जाहीर केले जाईल, असे सांगण्यात आले. उपस्थितांनी थंडगार पेयाचा आस्वाद घेतल्यानंतर बैठकीची सांगता झाली.
