जळगाव प्रतिनिधी । जळगाव शहरातील स्वातंत्र्य चौक ते नंदिनीबाई बेंडाळे शाळा या प्रमुख मार्गावरील दुभाजक सुशोभीकरण आणि देखभाल कामात ‘भंगाळे गोल्ड’ व्यवस्थापनाकडून महानगरपालिकेच्या नियमांचे सर्रास उल्लंघन होत असल्याचा गंभीर आरोप करण्यात आला आहे. या प्रकरणी सामाजिक कार्यकर्ते ॲड. पियुष नरेंद्रअण्णा पाटील यांनी मनपा प्रशासनाकडे लेखी तक्रार केली असून, संबंधित करार तातडीने रद्द करण्याची आणि दंडात्मक कारवाई करण्याची मागणी केली आहे.
जळगाव शहर महानगरपालिकेतर्फे शहरातील प्रमुख रस्त्यांवरील दुभाजकांच्या सुशोभीकरणासाठी सामाजिक संस्था व व्यावसायिकांना परवानगी दिली जाते. मनपाच्या नियमानुसार, या दुभाजकांवर लावण्यात येणाऱ्या जाहिरात फलकांवर ४० टक्के जागा महानगरपालिकेच्या नावासाठी आणि ६० टक्के जागा स्वतःच्या जाहिरातीसाठी राखीव ठेवणे बंधनकारक आहे. तसेच दोन फलकांमध्ये किमान १० मीटर (३२.५ फूट) अंतर असणे आवश्यक आहे. मात्र, भंगाळे गोल्डने या नियमांना हरताळ फासत फलकांवर १०० टक्के स्वतःच्याच व्यवसायाची जाहिरात केली असून मनपाचा कुठेही उल्लेख केलेला नाही. तसेच १० मीटर अंतराचा नियमही पाळलेला नाही.
तक्रारदार ॲड. पियुष पाटील यांच्या म्हणण्यानुसार, भंगाळे गोल्ड व्यवस्थापकांचे पुतणे हे मनपात सत्ताधारी गटाचे विद्यमान नगरसेवक आणि माजी महापौर असल्याने, ते आपल्या पदाचा दुरुपयोग करून प्रशासनावर दबाव आणत आहेत. भंगाळे गोल्डने यापूर्वीही शहरात अनधिकृत होर्डिंग्ज लावले होते, ज्यावर मनपाने दंडात्मक कारवाई केली होती. एकीकडे सर्वसामान्य आणि लहान व्यावसायिकांवर कठोर कारवाई करणारे मनपा प्रशासन या धनदांडग्यांवर काय कारवाई करते, याकडे आता संपूर्ण जळगाव शहराचे लक्ष लागून आहे. या संदर्भात महापौर, आयुक्त आणि पर्यावरण विभाग अभियंत्यांकडे रीतसर तक्रार दाखल करण्यात आली आहे.
