जळगाव प्रतिनिधी | जिल्हा पोलीस दलाने गुन्हेगारी मोडीत काढण्यासाठी आणि गुन्हेगारांवर कायद्याचा वचक निर्माण करण्यासाठी एक अत्यंत महत्त्वपूर्ण आणि व्यापक मोहीम हाती घेतली आहे.
जिल्ह्यातील सर्व पोलीस ठाण्यांच्या हद्दीतील हिस्ट्रीशीटर्स, सराईत गुन्हेगार (हॅबिच्युअल ऑफेंडर्स), शरीराविरुद्ध व मालमत्तेविरुद्ध गुन्हे करणारे, टवाळखोर तसेच प्रतिबंधात्मक कारवाईतील आरोपींना पोलीस ठाण्यात बोलावून त्यांचे ‘M.O.B (Modus Operandi Bureau) / Interrogation Forms’ भरून घेण्याची मोहीम आज, २३ मे रोजीपासून अत्यंत वेगाने सुरू करण्यात आली आहे.
काय आहे ‘क्रिमिनल डोजियर M.O.B डेटाबेस’? :
या मोहिमेत अत्यंत बारकाईने आणि अभ्यासपूर्वक तयार केलेला काही पानांचा एक विशेष फॉर्म गुन्हेगारांकडून भरून घेतला जात आहे. यामध्ये गुन्हेगाराची केवळ जुनी गुन्हेगारी पार्श्वभूमीच नाही, तर त्याची संपूर्ण ‘कुंडली’ संकलित केली जात आहे. यात कुटुंबाचा सविस्तर तपशील, पॅन कार्ड व इतर ओळखपत्रे, मालमत्ता, वाहने, सोशल मीडिया अकाउंट्स, शरीरावरील खुणा, टॅटू, मित्रपरिवार, गुन्हे करण्याची विशिष्ट पद्धत (Modus Operandi), त्याचे कार्यक्षेत्र, व्यसनाधीनता आणि कर्ज यांसारख्या सर्व महत्त्वाच्या माहितीचा समावेश आहे.
मोहिमेचा मुख्य उद्देश आणि फायदे:
या उपक्रमामुळे प्रत्येक पोलीस ठाण्याकडे गुन्हेगारांचा अद्ययावत आणि सविस्तर डेटाबेस उपलब्ध होणार आहे. यामुळे एखादा गुन्हा घडल्यास विविध पोलीस ठाण्यांमध्ये माहितीची त्वरित देवाण-घेवाण करणे शक्य होईल. बऱ्याचदा पोलीस अधिकाऱ्यांची किंवा अंमलदारांची बदली झाल्यानंतर नवीन अधिकाऱ्यांना स्थानिक गुन्हेगारांची माहिती मिळण्यास वेळ लागतो; मात्र या डेटाबेसमुळे नवीन पोलीस कर्मचाऱ्यांनाही गुन्हेगारांची प्रत्यक्ष ओळख आणि माहिती सहज उपलब्ध होईल.
सर्वात महत्त्वाचे म्हणजे, फरार आरोपींच्या मालमत्तेचा शोध घेऊन त्यांच्यावर जप्तीची कठोर कारवाई करणे आता अधिक सुलभ होणार आहे. पोलीस ठाण्याच्या आवारातच ही प्रक्रिया राबवली जात असल्याने गुन्हेगारांचे सार्वजनिक खच्चीकरण होत असून, नागरिकांमध्ये पोलिसांबद्दलचा विश्वास आणि कायद्याचा धाक अधिक बळकट होत आहे. जळगाव पोलिसांच्या या पॅटर्नचे सर्वत्र कौतुक होत आहे.
