धरणगाव प्रतिनिधी | धरणगाव शहरात सध्या चोरट्यांच्या टोळीने धुमाकूळ घातला असून, नागरिकांमध्ये प्रचंड भीतीचे वातावरण निर्माण झाले आहे. शहरातील चिंतामणी मोरया परिसरात तोंडाला मास्क लावलेले चार संशयित चोरटे सीसीटीव्ही कॅमेऱ्यात कैद झाले असून, या टोळीने परिसरात चांगलीच दहशत निर्माण केली आहे.
मिळालेल्या माहितीनुसार, पहाटे चार वाजेच्या सुमारास हे चार संशयित चोरटे चिंतामणी मोरया परिसरात संशयास्पद रित्या फिरत होते. याच दरम्यान परिसरातील एका सजग नागरिकाला हे चोरटे दिसताच, त्यांनी तातडीने आरडाओरडा करण्यास सुरुवात केली.
नागरिकांचा आवाज ऐकून घाबरलेल्या चोरट्यांच्या टोळीने घटनास्थळावरून तातडीने पळ काढला. मात्र, त्यापूर्वीच या चोरट्यांनी परिसरातील एक बंद घर आणि शेजारील छोटे दुकान लक्ष्य केले होते. चोरट्यांनी बंद घर फोडून आत प्रवेश केला, मात्र सुदैवाने घरातून त्यांच्या हाती काहीही लागले नाही. यानंतर त्यांनी शेजारील छोटे दुकान फोडले. दुकानातून काही किमती साड्या आणि गल्ल्यातील सुमारे चार ते पाच हजार रुपयांची रोकड घेऊन चोरटे पसार झाले.
चोरटे परिसरात फिरत असतानाची आणि चोरी करत असतानाची ही संपूर्ण घटना तिथल्या सीसीटीव्ही कॅमेऱ्यात कैद झाली आहे. या घटनेमुळे संपूर्ण धरणगाव शहरात सुरक्षेचा प्रश्न ऐरणीवर आला असून नागरिकांमध्ये चिंतेचे वातावरण आहे. या प्रकारानंतर संतप्त आणि भयभीत झालेल्या स्थानिक नागरिकांनी पोलिसांनी या भागात रात्रीची गस्त तातडीने वाढवावी, अशी मागणी केली आहे.
तसेच या चोरट्यांचा लवकरात लवकर बंदोबस्त करावा, अशी विनंतीही प्रशासनाला करण्यात आली आहे. दरम्यान, पोलिसांकडून सीसीटीव्ही फुटेजच्या आधारे या संशयित चोरट्यांचा कसून शोध सुरू असून, लवकरच त्यांना अटक करण्यात येईल अशी माहिती समोर येत आहे
