जळगाव प्रतिनिधी | जळगाव विधान परिषद निवडणुकीच्या उमेदवारी अर्ज दाखल करण्याच्या शेवटच्या दिवशी जिल्हाधिकारी कार्यालयात राजकीय घडामोडींना प्रचंड वेग आला. अर्ज भरण्याच्या अंतिम दिवशी उमेदवारांची मोठी गर्दी पाहायला मिळाली. मात्र, याच वेळी महायुतीला मोठा धक्का बसला असून, शिवसेना (शिंदे गट) आणि त्यांच्या मित्रपक्षातील दोन प्रमुख पदाधिकाऱ्यांनी थेट बंडखोरी करत अपक्ष उमेदवारी अर्ज दाखल केले आहेत. या नाट्यमय घडामोडींमुळे जळगावच्या राजकीय क्षेत्रात एकच खळबळ उडाली आहे.
निवडणुकीच्या अधिकृत उमेदवारांबद्दल बोलायचे झाले तर, महायुतीच्या वतीने भाजपचे अधिकृत उमेदवार नंदकिशोर महाजन यांनी आज आपला उमेदवारी अर्ज अत्यंत उत्साहात दाखल केला. तर दुसरीकडे, महाविकास आघाडीच्या वतीने शिवसेना (ठाकरे गट) पक्षाचे शरद तायडे यांनीही जोरदार शक्तीप्रदर्शन करत आपला उमेदवारी अर्ज निवडणूक निर्णय अधिकाऱ्यांकडे सुपूर्द केला. त्यामुळे ही लढत प्रामुख्याने महायुती विरुद्ध महाविकास आघाडी अशीच होईल, असा अंदाज वर्तवला जात होता.
परंतु, शेवटच्या क्षणी महायुती अंतर्गत असलेल्या अंतर्गत नाराजीचा स्फोट झाला. जळगाव महानगरपालिकेच्या शिवसेना (शिंदे गट) पक्षाच्या नगरसेविका रेश्मा कुंदन काळे यांनी पक्षाच्या अधिकृत निर्णयाला आव्हान देत अपक्ष म्हणून उमेदवारी अर्ज दाखल केला. त्यांच्या पाठोपाठ भुसावळ येथील नगरसेविका पती दीपक धांडे यांनी देखील बंडखोरीचे निशाण फडकवत अपक्ष म्हणून आपला उमेदवारी अर्ज भरला.
या दोन्ही स्थानिक नेत्यांच्या बंडखोरीमुळे महायुतीच्या अधिकृत उमेदवारासमोरील अडचणी वाढण्याची शक्यता निर्माण झाली आहे. ऐन निवडणुकीच्या तोंडावर झालेल्या या बंडखोरीमुळे आता जळगाव विधान परिषदेची निवडणूक अत्यंत चुरशीची आणि रंजक वळणावर येऊन पोहोचली आहे. राजकीय पक्षांचे नेते आता या बंडखोरांची मनधरणी करण्यात यशस्वी होतात की बंडखोर निवडणुकीच्या रिंगणात ठाम राहतात, याकडे संपूर्ण जिल्ह्याचे लक्ष लागले आहे.
