जामनेर प्रतिनिधी । जिल्ह्यातील फत्तेपूर पोलीस ठाण्याच्या हद्दीत एका ४० वर्षीय महिलेवर सामूहिक बलात्कार (गॅंगरेप) झाल्याचा खळबळजनक प्रकार उघडकीस आला आहे. या अमानुष घटनेने संपूर्ण जळगाव जिल्हा हादरला असून, पोलिसांनी तत्परता दाखवत १५ पैकी १४ मुख्य व सह-आरोपींना जेरबंद केले आहे.
मिळालेल्या माहितीनुसार, ही काळिमा फासणारी घटना २ जून रोजी घडली. पीडित ४० वर्षीय महिला तिच्या परिचयातील मित्रासोबत जात असताना, देऊळगाव-कापूसवाडी रस्त्यावरील ठांबरडा नाल्याजवळील निर्जन जंगल परिसरात दोन नराधमांनी तिला गाठले. त्या नराधमांनी मित्रासमोरच पीडित महिलेवर जबरदस्तीने सामूहिक बलात्कार केला. संतापजनक बाब म्हणजे, हा अत्याचार सुरू असताना तिथे उपस्थित असलेल्या इतर सह-आरोपींनी या संपूर्ण प्रकाराचे मोबाईलवर चित्रीकरण (व्हिडिओ) केले.
व्हिडिओ व्हायरल झाल्याने उडाली खळबळ :
घटना घडल्यानंतर काही दिवस हे प्रकरण दाबले गेले होते. मात्र, या प्रकरणातील एका संशयित आरोपीने अत्याचाराचा हा व्हिडिओ सोशल मीडियावर व्हायरल केला. व्हिडिओ समोर येताच परिसरात प्रचंड खळबळ उडाली आणि संतापाची लाट उसळली. घटनेची गांभीर्याने दखल घेत फत्तेपूर पोलिसांनी तात्काळ गुन्हा दाखल करून तपासाची चक्रे वेगाने फिरवली.
पोलिसांची धडक कारवाई :
पोलिसांनी नवीन कायद्यानुसार भारतीय न्याय संहिता (BNS) कलम ७०(१), ७७ तसेच माहिती तंत्रज्ञान कायदा (IT Act) कलम ६६ आणि ६७ अंतर्गत गुन्हा नोंदवला आहे. पोलीस अधीक्षकांनी स्वतः घटनास्थळी भेट देऊन पाहणी केली. पोलिसांनी या प्रकरणात एकूण १५ आरोपी निष्पन्न केले असून, त्यापैकी १४ जणांना अटक केली आहे. या घटनेतील एक आरोपी अद्याप फरार असून, पोलीस त्याचा युद्धपातळीवर शोध घेत आहेत. अशी माहिती विभागीय पोलीस अधिकारी बापू रोहम यांनी माध्यमांशी बोलतांना दिली आहे.
