उद्या १६ नगरपरिषद व २ नगरपंचायतींची मतमोजणी व निकाल
जळगाव : जिल्ह्यात राज्य निवडणूक आयोगाच्या आदेशानुसार सहा नगरपरिषदांमधील काही जागांच्या निवडणुका न्यायालयीन अपील व इतर कारणांमुळे पुढे ढकलण्यात आल्या होत्या. त्यासाठी निवडणूक प्रक्रिया नव्याने राबविण्यात आली असून, माघारीनंतर तीन जागा बिनविरोध ठरल्या आहेत. त्यामुळे उर्वरित नऊ जागांसाठी आज शनिवार, दि. २० डिसेंबर रोजी मतदान होत आहे.
या नऊ जागांसह २ डिसेंबर रोजी मतदान झालेल्या १६ नगरपरिषद व २ नगरपंचायतींतील एकूण ४५२ नगरसेवक पदे तसेच १७ ठिकाणी लोकनियुक्त नगराध्यक्ष पदासाठीची मतमोजणी रविवार, दि. २१ डिसेंबर रोजी होणार आहे. त्यामुळे गेल्या अनेक दिवसांपासून रखडलेल्या निकालाबाबतची नागरिकांची उत्सुकता अखेर संपणार आहे.
न्यायालयीन स्थगितीमुळे भुसावळ, अमळनेर, पाचोरा, सावदा, यावल आणि वरणगाव या सहा नगरपरिषदांमधील १२ जागांची निवडणूक प्रक्रिया पुढे ढकलण्यात आली होती. त्यापैकी भुसावळ नगरपरिषदेत एक तर सावदा नगरपरिषदेत दोन जागा बिनविरोध झाल्या आहेत. उर्वरित नऊ जागांसाठी एकूण ३७ उमेदवार रिंगणात असून आज या उमेदवारांचे भवितव्य मतपेटीत बंद होणार आहे.
दरम्यान, जिल्ह्यातील निवडणूक प्रक्रियेच्या पार्श्वभूमीवर कायदा व सुव्यवस्थेचा प्रश्न निर्माण होऊ नये, यासाठी जिल्हाधिकारी रोहन घुगे यांनी महत्त्वाचा आदेश दिला आहे. मतदान व मतमोजणीच्या दिवशी म्हणजे दि. २० व २१ डिसेंबर रोजी नगरपालिकांच्या हद्दीतील आठवडे बाजार बंद ठेवण्याचे आदेश देण्यात आले आहेत. यामुळे मतदान व मतमोजणी प्रक्रियेदरम्यान होणारी गर्दी टाळण्यास मदत होणार आहे.
दि. २१ डिसेंबर रोजी भुसावळ, भडगाव, चाळीसगाव, अमळनेर, पाचोरा, सावदा, यावल, वरणगाव, फैजपूर, रावेर, चोपडा, जामनेर, एरंडोल, पारोळा, धरणगाव, नाशिराबाद या नगरपरिषदांमध्ये तसेच मुक्ताईनगर व शेंदुर्णी या नगरपंचायतींमध्ये मतमोजणी होणार आहे. त्यामुळे जिल्ह्यातील राजकीय वातावरण तापले असून, नेते, कार्यकर्ते आणि नागरिकांचे लक्ष आता निकालांकडे लागले आहे.
बिनविरोध निवड झालेल्या जागांमुळे काही ठिकाणी तणावमुक्त वातावरण असले तरी उर्वरित नऊ जागांसाठी चुरस कायम आहे. त्यामुळे या निवडणुकांचे निकाल जिल्ह्यातील स्थानिक राजकारणाची दिशा ठरवणारे ठरणार असल्याचे चित्र सध्या स्पष्ट होत आहे.
