जळगाव प्रतिनिधी | जळगाव जिल्हा मध्यवर्ती सहकारी बँकेच्या निवडणुकीत राष्ट्रवादी काँग्रेस शरदचंद्र पवार पक्षाच्या महिला जिल्हाध्यक्ष कल्पिता पाटील यांनी उमेदवारी अर्ज दाखल केला आहे. जिल्हा बँकेच्या २१ जागांसाठी होत असलेल्या या निवडणुकीत अनेक दिग्गज नेत्यांनी उमेदवारी दाखल करण्यास सुरुवात केली असून, कल्पिता पाटील यांच्या उमेदवारीकडेही लक्ष लागले आहे. शेतकऱ्यांच्या हितासाठी काम करण्याचा निर्धार त्यांनी यावेळी व्यक्त केला.
कल्पिता पाटील यांचा राजकीय प्रवास विशेष उल्लेखनीय आहे. अवघ्या १८व्या वर्षी सरपंचपदाची जबाबदारी स्वीकारत त्यांनी राजकारणात प्रवेश केला होता. वडिलांच्या पश्चात त्यांनी राजकीय क्षेत्रात सक्रिय सहभाग घेतला. सध्या त्या राष्ट्रवादी काँग्रेस शरदचंद्र पवार पक्षाच्या महिला जिल्हाध्यक्ष म्हणून काम पाहत आहेत. स्थानिक स्वराज्य संस्थेतील अनुभवाच्या जोरावर आता त्यांनी जिल्हा बँकेच्या निवडणुकीत उमेदवारी अर्ज दाखल केला आहे.
उमेदवारी अर्ज दाखल केल्यानंतर बोलताना कल्पिता पाटील म्हणाल्या की, पक्षाच्या माध्यमातून शेतकऱ्यांच्या हितासाठी अनेकदा आंदोलने करण्यात आली आहेत. जिल्हा बँकेच्या सभासदांनी संधी दिल्यास शेतकऱ्यांच्या हितासाठी निश्चितपणे काम केले जाईल, असे आश्वासनही त्यांनी दिले. त्यामुळे त्यांच्या उमेदवारीतून शेतकरी आणि सहकार क्षेत्रातील प्रश्नांना किती महत्त्व दिले जाणार, याकडे लक्ष राहणार आहे.
दरम्यान, या निवडणुकीत मंत्री गिरीश महाजन, पालकमंत्री गुलाबराव पाटील, माजी मंत्री गुलाबराव देवकर, विद्यमान अध्यक्ष संजय पवार आणि आमदार नंदकुमार महाजन यांच्यासह अनेक नेत्यांची प्रतिष्ठा पणाला लागली आहे. शिवसेनेच्या शिंदे गटाचे आमदार किशोर आप्पा पाटील यांचे पुत्र सुमित पाटील यांनीही प्रथमच राजकारणात प्रवेश करत उमेदवारी अर्ज दाखल केला आहे.
अशा परिस्थितीत कल्पिता पाटील यांच्या उमेदवारीमुळे जिल्हा बँकेच्या निवडणुकीतील महिला नेतृत्व आणि शेतकरीहिताचे मुद्दे चर्चेत आले आहेत. आता सभासदांचा कौल कोणाच्या बाजूने लागतो, हे निवडणुकीच्या निकालानंतर स्पष्ट होईल.
