पारोळयात गावठी कट्ट्यासह एकास अटक
पारोळा : पारोळा तालुक्यातील शवेगे बुद्रुक फाट्यावर गावठी कट्ट्यासह एकाला पोलीसांनी ताब्यात घेतले असल्याची माहिती देण्यात आली आहे. तालुक्यातील शेवगे बुद्रुक परिसरात रात्रीच्या सुमारास चारचाकी वाहनातून काही शस्त्र जाणार असल्याची गोपनीय माहिती येथील पोलिस स्टेशनला मिळाल्याने पोलीसांनी सापळा रचला व गावठी कट्टा बाळगून फिरणाऱ्या दोघांपैकी एकास पारोळा पोलिसांनी जेरबंद केले तर दुसरा आरोपी अंधाराचा फायदा घेत फरार झाला.
याबाबत पारोळा पोलिस निरीक्षक अशोक पवार यांना दि ४ फेब्रुवारी रोजी रात्री बहादरपूर-पारोळा रस्त्यावर शस्त्रधारी व्यक्ती फिरत असल्याची गोपनीय माहिती मिळाली होती. ५ रोजी रात्री सुमारे दीड वाजता शेवगे बुद्रुक येथील वळणाजवळ एमएच १९ सि वाय २५७५ क्रमांकाची कारला संशयावरून अडवण्यात आले गाडीत शुभम गणेश महाजन वय १९, रा. अमळनेर दरवाजा, एरंडोल व योगेश रमेश पाटील वय २४, रा. शेवगे बुद्रुक, ता. पारोळा हे दोघे आढळले.
झडतीदरम्यान योगेश पाटील याच्या कमरेला बेकायदेशीर गावठी कट्टा आढळून आला. पोलिसांनी दोघांना ताब्यात घेत असताना योगेश पाटील हा पोलीसांना गुंगारा देत अंधाराचा फायदा घेऊन फरार झाला तर शुभम महाजन याला पोलिसांनी ताब्यात घेतले असून पोलिसांनी गावठी कट्टा व मारुती स्विफ्ट कारसह सुमारे २ लाख २५ हजार रुपयांचा मुद्देमाल जप्त केला. पुढील तपास पारोळा पोलिस करीत आहेत.
