जळगाव प्रतिनिधी । महाराष्ट्र दिन आणि आंतरराष्ट्रीय कामगार दिनाचे औचित्य साधत ‘नारीशक्ती बहुउद्देशीय संस्था, जळगाव’ यांच्या वतीने कष्टकरी महिला कामगारांच्या सन्मानाचा विशेष कार्यक्रम आयोजित करण्यात आला आहे. हा सोहळा शुक्रवार, १ मे रोजी सकाळी ९:३० वाजता कृषी उत्पन्न बाजार समितीच्या पहिल्या गेटजवळील सभापती दालनात पार पडणार आहे.
समाजाच्या प्रगतीत महिलांचे योगदान अनन्यसाधारण आहे. घर आणि काम यांचा समतोल साधत अनेक महिला कठोर परिश्रम करत आहेत. त्यांच्या या जिद्दीला आणि कष्टाला मानाचा मुजरा देण्यासाठी हा उपक्रम हाती घेण्यात आला आहे. बदलत्या काळात महिला प्रत्येक क्षेत्रात आपली छाप उमटवत असून, संकटांनाही धैर्याने सामोरे जात आहेत. त्यामुळे त्यांच्या कार्याचा गौरव करून त्यांना प्रोत्साहन देणे, हा या कार्यक्रमामागील प्रमुख हेतू आहे.
या सन्मान सोहळ्यात विविध क्षेत्रातील मान्यवर उपस्थित राहणार असून, त्यांच्या हस्ते महिला कामगारांचा गौरव करण्यात येणार आहे. यावेळी महिलांच्या सशक्तीकरणाचा संदेश देत त्यांना पुढील वाटचालीसाठी प्रेरणा दिली जाणार आहे.
कार्यक्रमाच्या यशस्वी आयोजनासाठी संस्थेच्या सर्व पदाधिकाऱ्यांनी आणि सदस्यांनी वेळेवर उपस्थित राहावे, असे आवाहन आयोजकांनी केले आहे. या उपक्रमामुळे कष्टकरी महिलांच्या कार्याला योग्य तो सन्मान मिळणार असून, समाजात सकारात्मक संदेशही पोहोचणार आहे.
