जळगाव प्रतिनिधी । जळगाव शहरालगत असलेल्या जळगाव तालुका पोलीस स्टेशनच्या हद्दीत एक धक्कादायक घटना समोर आली आहे. आपल्या आजोबांच्या वाहनाला झालेल्या अपघाताबाबत विचारपूस करण्यासाठी गेलेल्या एका २२ वर्षीय तरुणाला बेदम मारहाण करण्यात आली आहे. या प्रकरणी जळगाव तालुका पोलीस ठाण्यात ४ जणांवर गुन्हा दाखल करण्यात आला.
याबाबत अधिक माहिती अशी की, फैजल शेख कलीमोद्दीन (वय २२, रा. इस्लामपुरा, जळगाव) यांचे आजोबा आणि मयुर लहासे यांच्या कारचा काही वेळापूर्वी अपघात झाला होता. या अपघाताबाबत माहिती घेण्यासाठी आणि विचारपूस करण्यासाठी फैजल हे आपल्या आजोबांसह १ मे रोजी रात्री १० वाजेच्या सुमारास जळगाव-पाळधी नवीन हायवेवरील पुलाखाली असलेल्या अत्तरदे पेट्रोल पंपाजवळ गेले होते.
अपघाताबाबत विचारपूस सुरू असतानाच वादाचे पर्यावसान हाणामारीत झाले. यावेळी आरोपी मुन्ना पहलवान याने रागाच्या भरात हातातील लाकडी काठीने फैजलच्या डोक्यावर आणि डोळ्याजवळ जोरदार प्रहार केला. या हल्ल्यात फैजल गंभीर जखमी झाला आहे. केवळ इतकेच नव्हे, तर इतर आरोपी मयूर लहारे, खुशाल वालकर आणि रतिलाल सोनवणे यांनी फैजल आणि त्यांच्या आजोबांना अर्वाच्च भाषेत शिवीगाळ करत लाथाबुक्क्यांनी बेदम मारहाण केली. याप्रकरणी जळगाव तालुका पोलीस ठाण्यात गुन्हा दाखल करण्यात आला. पुढील तपास पोहेकॉ गुलाब माळी हे करीत आहे.
