जळगाव प्रतिनिधी | जळगाव शहरातील मुख्य बाजारपेठ असलेल्या महात्मा फुले मार्केट, दाना बाजार आणि कोंबडी बाजार परिसरात आज सकाळी अतिक्रमण निर्मूलन पथकाने धडक कारवाई केली. या मोहिमेमुळे अनधिकृतपणे जागा व्यापणाऱ्या विक्रेत्यांची आणि दुकानदारांची मोठी धांदल उडाली. सकाळपासून सुरू झालेली ही कारवाई दुपारी १२ वाजेपर्यंत सुरू होती.
आज सकाळी ठीक ८ वाजेच्या सुमारास अतिक्रमण निर्मूलन पथक फुले मार्केट परिसरात दाखल झाले. मार्केटमधील मीटर रूमच्या जागेत काही जणांनी अनधिकृतपणे ऑफिस थाटले होते. या ठिकाणी ठेवलेले टेबल, बाकडे आणि इतर कार्यालयीन साहित्य पथकाने तत्काळ जप्त केले. मीटर रूम सारख्या संवेदनशील ठिकाणी अशा प्रकारे अतिक्रमण केल्याने प्रशासनाने ही कठोर पावले उचलली आहेत.
फुले मार्केटमधील कारवाईनंतर हे पथक दाना बाजार आणि कोंबडी बाजार परिसराकडे वळले. या भागात रस्त्यावर अडथळा ठरणारे साहित्य आणि अनधिकृतपणे उभ्या असलेल्या ३ हातगाड्या पथकाने जप्त केल्या. या कारवाईमुळे बाजारपेठेतील मुख्य रस्त्यांनी मोकळा श्वास घेतला असून वाहतुकीची कोंडी काही प्रमाणात कमी झाली आहे.
सदर मोहीम अतिक्रमण निर्मूलन अधीक्षक संजय ठाकूर यांच्या प्रत्यक्ष मार्गदर्शनाखाली राबवण्यात आली. “शहरातील मुख्य बाजारपेठांमध्ये नागरिकांना चालण्यासाठी आणि वाहतुकीसाठी अडथळा ठरणारी अतिक्रमणे खपवून घेतली जाणार नाहीत,” असा स्पष्ट इशारा यावेळी प्रशासनाकडून देण्यात आला.
या कारवाईत अतिक्रमण विभागाचे कर्मचारी आणि पोलीस बंदोबस्त तैनात होता. अचानक झालेल्या या कारवाईमुळे दिवसभर बाजारपेठेत चर्चेचा विषय रंगला होता. आगामी काळातही ही मोहीम अशीच तीव्र राहणार असल्याचे संकेत पथकाने दिले आहेत.
