जामनेर प्रतिनिधी | आयपीएल क्रिकेट सामन्यांच्या निमित्ताने सुरू असलेल्या ऑनलाईन सट्ट्याविरुद्ध स्थानिक गुन्हे शाखेने जामनेर परिसरात मोठी कारवाई केली आहे. हिवरखेडा रोडवरील एका घरात सुरू असलेल्या सट्ट्यावर छापा टाकून पोलिसांनी सुमारे १० लाख ५३ हजार ८०० रुपयांचा मुद्देमाल जप्त केला असून चार संशयितांना ताब्यात घेतले आहे.
जामनेर पोलीस स्टेशनच्या हद्दीत हिवरखेडा रोडवर एका घरात काही इसम आयपीएल क्रिकेट मॅचवर ऑनलाईन सट्टा लावून जुगार खेळत असल्याची गोपनीय माहिती पोलिसांना मिळाली होती. या माहितीच्या आधारे पथकाने सापळा रचून सदर ठिकाणी धाड टाकली.
या कारवाईत पोलिसांनी ९ लाख २ हजार ३०० रुपये रोख रक्कम, १ लाख ३० हजार रुपये किमतीचे मोबाईल फोन,२५ हजार रुपये किमतीचा एक टीव्ही आणि साउंड बार, ४१ एटीएम (ATM) कार्ड्स आणि इतर साहित्य जप्त करण्यात आले आहे.
याप्रकरणी देवानंद सुभाष सोनवणे, रितेश अशोक नेरकर, परीक्षित रवींद्र पाटील आणि प्रवीण जगन्नाथ टहाकडे (सर्व रा.जामनेर) या चार आरोपींना अटक करण्यात आली आहे. त्यांच्याविरुद्ध जामनेर पोलीस ठाण्यात गुन्हा ल दाखल करण्यात आला आहे.
