जळगाव प्रतिनिधी | गणेशोत्सवाच्या उत्साहपूर्ण वातावरणात सामाजिक एकोपा, बंधुभाव आणि भक्तीची परंपरा जपत वरद प्रतिष्ठान, प्रेमनगर, जळगाव यांच्या वतीने बुधवार 23 सप्टेंबर 2026 रोजी सकाळी 11 वाजल्यापासून भव्य महाप्रसाद (भंडारा) आयोजित करण्यात आला आहे.
या धार्मिक व सामाजिक उपक्रमात प्रेमनगर तसेच परिसरातील नागरिकांनी मोठ्या संख्येने सहभागी होऊन महाप्रसादाचा लाभ घ्यावा, असे आवाहन वरद प्रतिष्ठान मित्र मंडळाचे संस्थापक अध्यक्ष सागर भाऊ पाटील यांनी केले आहे.
गणेशोत्सव हा केवळ धार्मिक उत्सव न राहता समाजातील सर्व घटकांना एकत्र आणणारा आणि आपुलकीचे नाते अधिक दृढ करणारा उत्सव म्हणून साजरा केला जातो. याच सामाजिक भावनेतून वरद प्रतिष्ठानच्या माध्यमातून दरवर्षी विविध धार्मिक व सामाजिक उपक्रम राबविण्यात येत आहेत. यंदाही गणेश चतुर्थीनिमित्त आयोजित करण्यात आलेल्या महाप्रसादाच्या माध्यमातून नागरिकांना एकत्र आणण्याचा प्रयत्न करण्यात आला आहे.
महाप्रसादाच्या आयोजनासाठी मंडळाच्या कार्यकर्त्यांकडून जय्यत तयारी करण्यात आली असून, येणाऱ्या भाविक व नागरिकांना कोणतीही गैरसोय होऊ नये यासाठी आवश्यक नियोजन करण्यात आले आहे. गणेशभक्तीबरोबरच ‘एकत्र येऊया, प्रसादाचा लाभ घेऊया आणि सामाजिक बांधिलकी जपूया’ या भावनेतून हा उपक्रम आयोजित करण्यात आला आहे.
या उपक्रमासाठी कल्पेश मालपाणी, बंटी वाणी, समीर तडवी, अल्पेश न्याती, हितेश चौधरी, गोपाल लाठी, दीपक भंडारी, दीपक वाणी, दीपक पाटील, प्रणय वाणी, हर्षित धनगर, सुरेश मराठे, भिकन पाटील, बंटी जगताप, गिरीष बाविस्कर, विवेक वाणी, सिद्धांत कोलते, वैभव सोनार, अनिकेत झोपे, दर्शन अजमेरा यांच्यासह वरद प्रतिष्ठानच्या सर्व कार्यकर्त्यांचे विशेष सहकार्य लाभत आहे.
प्रेमनगरातील नागरिकांनी तसेच जळगाव शहरातील गणेशभक्तांनी या महाप्रसादाच्या कार्यक्रमास आवर्जून उपस्थित राहून श्री गणरायाचे आशीर्वाद घ्यावेत व महाप्रसादाचा लाभ घ्यावा, असे आवाहन आयोजकांच्या वतीने करण्यात आले आहे.
