जळगाव प्रतिनिधी | यावल तालुक्यातील किनगाव आणि मालोद परिसरातील शेतशिवारातून वीज तार आणि केबल चोरी करणाऱ्या टोळीचा यावल पोलिसांनी पर्दाफाश केला आहे. या कारवाईमुळे परिसरातील शेतकऱ्यांच्या वीज तार चोरीच्या घटनांना मोठा आळा बसण्याची शक्यता आहे. पोलिसांनी या प्रकरणात १० संशयितांना ताब्यात घेतले असून, न्यायालयाने त्यांना पाच दिवसांची पोलीस कोठडी सुनावली आहे.
किनगाव आणि मालोद परिसरातील शेतांमध्ये वारंवार वीज तार आणि केबल चोरीच्या घटना घडत होत्या. या घटनांमुळे शेतकऱ्यांचे मोठे आर्थिक नुकसान होत होते. याप्रकरणी पोलिसांनी तपासाची चक्रे वेगाने फिरवत संशयितांचा माग काढला. तपासादरम्यान चोरीच्या घटनांशी संबंधित व्यक्तींना ताब्यात घेण्यात आले.
या कारवाईत पोलिसांनी सुमारे ६ लाख ४२ हजार रुपयांचा मुद्देमाल जप्त केला आहे. चोरीच्या वीज तारांसह केबल आणि इतर साहित्याचा यामध्ये समावेश असल्याची माहिती आहे. दरम्यान, चोरीचा मुद्देमाल खरेदी करणाऱ्या जळगावातील एका भंगार व्यावसायिकालाही पोलिसांनी ताब्यात घेतले आहे. त्याच्याकडूनही चोरीचा मुद्देमाल जप्त करण्यात आला आहे.
पोलिसांच्या तपासात या कारवाईतून वीज तार चोरीचे पाच गुन्हे उघडकीस आल्याची माहिती समोर आली आहे. या टोळीचे आणखी कोणाशी संबंध आहेत का, चोरीचा मुद्देमाल कुठे विकला जात होता आणि या प्रकरणात आणखी कोणाचा सहभाग आहे का, याचा पोलीस तपास सुरू आहे.
या कारवाईमुळे यावल तालुक्यातील वीज तार चोरीच्या घटनांचा छडा लावण्यात पोलिसांना महत्त्वाचे यश मिळाले आहे.
