भुसावळ प्रतिनिधी | भुसावळ तालुका पोलीस ठाण्यात दाखल असलेल्या गुन्ह्यात अटक न करण्यासाठी पैशांची मागणी केल्याची तक्रार लाचलुचपत प्रतिबंधक विभागाकडे करण्यात आली होती. या प्रकरणी अमन जसबिंदर सनसोये वय ३६ वर्षे, रा. दीप नगर, भुसावळ या खासगी व्यक्तीला ताब्यात घेण्यात आल्याची माहिती ACBच्या प्रसिद्धीपत्रकात देण्यात आली आहे.
प्रसिद्धीपत्रकानुसार, तक्रारदार आणि अन्य तीन जणांविरोधात भुसावळ तालुका पोलीस ठाण्यात गुन्हा दाखल आहे. या गुन्ह्यात अटक न करण्यासाठी तक्रारदारासह अन्य तीन जणांकडून प्रत्येकी २५ हजार रुपये, म्हणजेच एकूण एक लाख रुपयांची मागणी करण्यात आल्याची तक्रार ACBकडे करण्यात आली होती.
या तक्रारीची लाचलुचपत प्रतिबंधक विभागाकडून पडताळणी करण्यात आली. त्यानंतर पुढील कायदेशीर कारवाई करण्यात येत असल्याचे प्रसिद्धीपत्रकात नमूद आहे. प्रकरणात आरोपी म्हणून अमन जसबिंदर सनसोये याचे नाव नमूद करण्यात आले असून, त्याला ताब्यात घेण्यात आल्याचे सांगण्यात आले आहे.
या कारवाईत पोलीस निरीक्षक हेमंत नागरे हे सापळा अधिकारी असून, पोलीस उपअधीक्षक योगेश ठाकूर हे पर्यवेक्षक अधिकारी आहेत. पोलीस नाईक, पोलीस हवालदार आणि इतर पथकातील कर्मचाऱ्यांनी कारवाईत सहभाग घेतला. पुढील तपास लाचलुचपत प्रतिबंधक विभागाकडून सुरू आहे.
