रावेर प्रतिनिधी | रावेर तालुक्यातील केऱ्हाडा गावातील इंदिरानगर परिसरात २४ वर्षीय तरुणाचा निर्घृण खून झाल्याची धक्कादायक घटना समोर आली आहे. राजेंद्र रवींद्र कापडे असे मृत तरुणाचे नाव आहे. या घटनेने परिसरात एकच खळबळ उडाली असून, नागरिकांमध्ये भीतीचे वातावरण निर्माण झाले आहे.
प्राथमिक माहितीनुसार, राजेंद्र कापडे आणि रामसिंग भिल्ल यांच्यात काही कारणावरून वाद झाला होता. या वादाचे रूपांतर हाणामारीत झाले. याचवेळी संतापाच्या भरात रामसिंग भिल्ल याने ब्लेंडर मशीनच्या कटरने राजेंद्र यांच्या गळ्यावर वार केल्याचा आरोप आहे. या हल्ल्यात राजेंद्र कापडे गंभीर जखमी झाले.
घटनेनंतर त्यांना तातडीने रावेर ग्रामीण रुग्णालयात उपचारासाठी दाखल करण्यात आले. मात्र, डॉक्टरांनी तपासणी केल्यानंतर त्यांना मृत घोषित केले. घटनेची माहिती मिळताच रावेर पोलिसांनी तातडीने घटनास्थळी धाव घेतली.
या प्रकरणी संशयित रामसिंग भिल्ल याला पोलिसांनी ताब्यात घेतले आहे. खून नेमका कोणत्या कारणातून झाला, वादाचे मूळ काय होते आणि हत्येमागे आणखी काही कारण आहे का, याचा तपास रावेर पोलीस करत आहेत. पुढील तपासात या घटनेचे संपूर्ण कारण स्पष्ट होणार आहे.
