जळगाव प्रतिनिधी | किनगाव येथे घडलेल्या घटनेवरून आता राजकीय वातावरण तापू लागले आहे. या घटनेवर काँग्रेसचे जिल्हाध्यक्ष धनंजय चौधरी यांनी पत्रकार परिषदेत भूमिका मांडत पोलीस प्रशासनावर गंभीर आरोप केले आहेत. किनगाव येथील घटना दुर्दैवी असल्याचे सांगत त्यांनी या संपूर्ण प्रकरणाच्या घडामोडींवर प्रश्न उपस्थित केले.
राष्ट्रीय स्वयंसेवक संघाच्या पथसंचलनासाठी ठराविक रस्त्यावरून जाण्याची परवानगी पोलिसांकडून घाईघाईने घेण्यात आली होती, असा दावा धनंजय चौधरी यांनी केला. पथसंचलनाच्या मार्गावरून निर्माण झालेल्या परिस्थितीमुळे हा वाद घडल्याचे त्यांनी सांगितले.
या घटनेदरम्यान झालेल्या लाठीचार्जबाबतही चौधरी यांनी महत्त्वपूर्ण आरोप केला. लाठीचार्ज राष्ट्रीय स्वयंसेवक संघाने केला नसून, तो पोलिसांच्या माध्यमातून करण्यात आला असल्याचे त्यांनी म्हटले. त्यामुळे या घटनेतील नेमकी वस्तुस्थिती काय, असा सवाल त्यांनी उपस्थित केला.
तसेच, घटनेनंतर समाजात चुकीचे संदेश पसरवण्यात आल्याचा आरोपही त्यांनी केला. अशा घटनांमुळे सामाजिक वातावरण बिघडण्याची शक्यता असल्याने वस्तुस्थिती समोर येणे आवश्यक असल्याचे त्यांनी सूचित केले.
दरम्यान, काँग्रेस जिल्हाध्यक्षांनी केलेल्या या आरोपांमुळे किनगाव प्रकरणाला राजकीय वळण मिळाले आहे. त्यांच्या आरोपांवर पोलीस प्रशासन आणि संबंधित संघटनेकडून काय स्पष्टीकरण दिले जाते, याकडे आता सर्वांचे लक्ष लागले आहे.
