जळगाव प्रतिनिधी | तालुक्यातील भोकर येथील स्टेट बँक ऑफ इंडियाच्या शाखेवर दरोडा टाकल्याची धक्कादायक घटना समोर आली असून, या घटनेने संपूर्ण जिल्ह्यात खळबळ उडाली आहे. दरोड्याची माहिती मिळताच पोलिसांनी वेगाने तपासाची चक्रे फिरवत धरणगाव तालुक्यातील चावलखेडा येथून तीन संशयित आरोपींना अटक केली आहे. पोलीस अधीक्षक श्रीकांत धिवरे यांनी प्रसिद्धीपत्रकाद्वारे या कारवाईची माहिती दिली आहे.
मिळालेल्या माहितीनुसार, भोकर येथील स्टेट बँक ऑफ इंडियाच्या शाखेत आज दुपारी चार वाजेच्या सुमारास दरोड्याची धक्कादायक घटना उघडकीस आली. भरदिवसा बँकेसारख्या महत्त्वाच्या आर्थिक संस्थेला लक्ष्य करण्यात आल्याने परिसरात एकच खळबळ उडाली. या घटनेची माहिती मिळताच स्थानिक पोलिसांनी तातडीने हालचाली सुरू केल्या.
या प्रकरणातील तपासादरम्यान एक महत्त्वाची बाब समोर आली आहे. संशयित आरोपींपैकी एक जण चादर विक्रीचा बहाणा करून गावात फिरत होता. या बहाण्याने तो परिसराची रेकी करत असल्याचे निष्पन्न झाले आहे. म्हणजेच चादर विक्रीच्या आडून बँकेची आणि परिसराची माहिती गोळा केली जात होती का, या दिशेनेही तपास महत्त्वाचा ठरणार आहे.
घटनेची माहिती मिळताच जळगाव तालुका पोलिसांनी घटनास्थळी धाव घेतली. त्यानंतर संशयितांचा माग काढत पोलिसांनी पाठलाग सुरू केला. पोलिसांच्या या तत्पर कारवाईत धरणगाव तालुक्यातील चावलखेडा येथून दरोड्याशी संबंधित तीन संशयितांना अटक करण्यात आली.
पोलीस अधीक्षक श्रीकांत धिवरे यांनी प्रसिद्धीपत्रकाच्या माध्यमातून तीन संशयितांना अटक केल्याच्या वृत्ताला दुजोरा दिला आहे.
दरम्यान, भरदिवसा बँकेवर दरोडा टाकण्याचे धाडस करणाऱ्या संशयितांच्या अटकेमुळे पोलिसांच्या तपासाला महत्त्वाचे वळण मिळाले आहे. या दरोड्यामागे आणखी कोणाचा सहभाग आहे का? आरोपींनी यापूर्वीही अशा प्रकारच्या घटनांची तयारी केली होती का? बँकेतील किती मुद्देमाल लुटण्यात आला? यासह अनेक प्रश्नांची उत्तरे पोलीस तपासातून समोर येणार आहेत.
या घटनेमुळे भोकरसह जळगाव तालुक्यात भीतीचे वातावरण निर्माण झाले असून, बँकांच्या सुरक्षेचा प्रश्न पुन्हा एकदा ऐरणीवर आला आहे.
