जळगाव प्रतिनिधी | जळगाव शहराच्या मूलभूत सोयी-सुविधांचा विकास करण्यासाठी महाराष्ट्र शासनाच्या नगरविकास विभागामार्फत जळगाव महानगरपालिकेला १० कोटी रुपयांचा निधी मंजूर करण्यात आला आहे. सन २०२६-२७ या आर्थिक वर्षासाठी ‘महानगरपालिका क्षेत्रात मूलभूत सोयी-सुविधांच्या विकासासाठी विशेष तरतूद’ या योजनेंतर्गत हा निधी उपलब्ध करून देण्यात आला असून, यासंदर्भातील शासन निर्णय ५ नोव्हेंबर रोजी निर्गमित करण्यात आला आहे.
शहरातील विविध भागांमध्ये विकासकामे करण्यासाठी निधी मिळावा, यासाठी आ.सुरेश भोळे यांनी मुख्यमंत्री देवेंद्र फडणवीस यांच्याकडे सातत्याने पाठपुरावा केला होता. त्यांच्या मागणीला सकारात्मक प्रतिसाद मिळाल्यानंतर जळगाव शहरासाठी १० कोटी रुपयांचा निधी मंजूर झाला आहे.
या निधीतून शहरातील सर्व १९ प्रभागांमध्ये विविध विकासकामे करण्यात येणार आहेत. तसेच शहराच्या प्रमुख प्रवेशमार्गांवर आधुनिक प्रकाशव्यवस्था उभारण्यासाठीही निधीची तरतूद करण्यात आली आहे. त्यामुळे शहरातील अंतर्गत भागांमधील नागरी सुविधांमध्ये सुधारणा होण्यासोबतच प्रमुख रस्त्यांवरील रात्रीची वाहतूक अधिक सुरक्षित होण्यास मदत होणार आहे.
शहरातील प्रत्येक प्रभागाचा समतोल विकास, दर्जेदार रस्ते आणि नागरिकांना आवश्यक असलेल्या मूलभूत सुविधा उपलब्ध करून देण्यावर भर दिला जाणार आहे. याशिवाय शहरातील प्रलंबित रस्ते विकासकामे लवकरात लवकर पूर्ण व्हावीत, यासाठी संबंधित यंत्रणांकडे पाठपुरावा सुरू ठेवण्यात येणार असल्याचे आमदार भोळे यांनी स्पष्ट केले.
दरम्यान, जळगाव शहराच्या विकासासाठी निधी मंजूर केल्याबद्दल आमदार सुरेश भोळे यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, मंत्री गिरीश महाजन, पालकमंत्री गुलाबराव पाटील आणि मंत्री संजय सावकारे यांचे आभार व्यक्त केले.
शहराच्या सर्वांगीण विकासासाठी भविष्यातही शासनाकडून अधिकाधिक निधी उपलब्ध करून घेण्यासाठी प्रयत्नशील राहणार असल्याची भूमिका आमदार सुरेश भोळे यांनी व्यक्त केली.
