जळगाव प्रतिनिधी | गणेशोत्सवाच्या पार्श्वभूमीवर जळगावच्या बाजारपेठेत कोकणातील रायगड जिल्ह्यातील पेण येथून शाडू मातीच्या आकर्षक आणि सुबक गणेशमूर्ती विक्रीसाठी दाखल झाल्या आहेत. पर्यावरणपूरक गणेशोत्सव साजरा करण्यासाठी यंदा शाडू मातीच्या मूर्तींना ग्राहकांकडून चांगली पसंती मिळत असल्याचे चित्र पाहायला मिळत आहे.
जळगावातील श्री गणेश कला केंद्रात पेणच्या कारागिरांनी तयार केलेल्या विविध आकारांच्या आणि आकर्षक कलाकुसरीच्या मूर्ती उपलब्ध आहेत. नैसर्गिक मातीसोबत नैसर्गिक रंगांचा वापर करून या मूर्ती तयार केल्या जात असल्याने त्या पर्यावरणपूरक आणि शाश्वत असल्याचे विक्रेत्यांनी सांगितले.
घरगुती गणेशमूर्तींसह छोट्या सार्वजनिक गणेश मंडळांकडूनही शाडू मातीच्या मूर्ती खरेदी करण्याकडे कल वाढला आहे. सहा इंचांपासून तब्बल अडीच फुटांपर्यंत विविध आकारांच्या मूर्ती ग्राहकांसाठी उपलब्ध आहेत. पारंपरिक रूपापासून आधुनिक कलाकुसरीपर्यंत अनेक आकर्षक पर्याय येथे पाहायला मिळत आहेत.
दरम्यान, यंदा वाहतुकीचा खर्च वाढल्याने शाडू मातीच्या मूर्तींच्या दरात मागील वर्षाच्या तुलनेत सुमारे दहा टक्क्यांनी वाढ झाली आहे. मात्र, किंमती वाढल्या असतानाही पर्यावरण संवर्धनाचा विचार करून ग्राहकांकडून शाडू मातीच्या मूर्तींना वाढती मागणी मिळत असल्याचे विक्रेत्यांचे म्हणणे आहे.
एकूणच, ‘बाप्पा मोरया’च्या जयघोषासोबत पर्यावरणपूरक गणेशोत्सव साजरा करण्यासाठी जळगावकरांचा शाडू मातीच्या गणेशमूर्तींकडे वाढता कल दिसून येत आहे.
