अमळनेर प्रतिनिधी | शहरातील मुंदडा नगर परिसरात बंद घराचे कुलूप तोडून अज्ञात चोरट्याने सोन्या-चांदीच्या दागिन्यांसह ७० हजार २०० रुपयांचा मुद्देमाल लंपास केला. या प्रकरणी अमळनेर पोलीस ठाण्यात घरफोडीचा गुन्हा दाखल करण्यात आला आहे.
मुंदडा नगर भागात गणेश रामभाऊ पाटील पाटील यांचे राहते घर आहे. त्यांच्या आजीचे निधन झाल्यानंतर घराला कुलूप लावून ते मूळ गावी गेले होते. दरम्यान, १२ सप्टेंबर रोजी रात्री ११ वाजेपासून १३ सप्टेंबर रोजी सकाळी ७ वाजेच्या दरम्यान अज्ञात चोरट्याने बंद घराला लक्ष्य केले.
चोरट्याने घराचे कुलूप आणि कडीकोयंडा तोडून आत प्रवेश केला. घरातील कपाट उघडून त्यामधील सोन्या-चांदीचे दागिने चोरून नेले. घरफोडीची घटना लक्षात आल्यानंतर गणेश रामभाऊ पाटील यांनी याबाबत माहिती दिली. तसेच अनिल आत्माराम महाजन यांच्याशीही याबाबत विचारणा करण्यात आली.
चोरीस गेलेल्या मुद्देमालामध्ये २३ ग्रॅम वजनाची सोन्याची माळ, २२ ग्रॅम वजनाची सोन्याची माळ, ८ ग्रॅम वजनाची सोन्याची चेन, एक भार वजनाचे पाच चांदीचे देवाचे शिक्के आणि साडेतीन भार वजनाचे चांदीचे जोडवे यांचा समावेश आहे. या सर्व मुद्देमालाची एकूण किंमत ७० हजार २०० रुपये असल्याचे पोलिसांत नमूद करण्यात आले आहे.
अमळनेर पोलीस ठाण्यात अज्ञात चोरट्याविरुद्ध गुन्हा दाखल करण्यात आला असून पोलीस नाईक श्री. शरद काककळींज तपास करीत आहेत. चोरट्याचा शोध सुरू आहे.
