जामनेर प्रतिनिधी :- तहसील कार्यालयात प्रलंबित असलेल्या विविध वादग्रस्त महसुली प्रकरणांचा जलद गतीने निपटारा व्हावा, यासाठी गुरुवारी जामनेर तहसील कार्यालयात प्रथमच ‘महात्मा ज्योतिराव फुले लोकअदालत’ उत्साहात पार पडली. तहसीलदार नानासाहेब आगळे यांच्या अध्यक्षतेखाली झालेल्या या लोकअदालतीत वकील व पक्षकारांनी उत्स्फूर्त सहभाग नोंदवून आपसातील सामंजस्याने अनेक प्रकरणांवर तोडगा काढला.
महाराष्ट्र शासनाच्या महसूल विभागाच्या निर्देशानुसार, न्यायप्रविष्ट प्रकरणांमधील पक्षकारांना तत्काळ न्याय मिळण्यासाठी दिवाणी व फौजदारी न्यायालयांप्रमाणेच कार्यकारी दंडाधिकारी न्यायालय असलेल्या तहसील कार्यालयांमध्येही लोकअदालत घेण्याचे आदेश देण्यात आले होते. त्यानुसार तहसील कार्यालयाच्या सभागृहात या विशेष लोकअदालतीचे आयोजन करण्यात आले होते.
या वेळी निवासी नायब तहसीलदार सतीश इंगळे, नायब तहसीलदार प्रसंजीत गांगुर्डे, जामनेर वकील संघाचे अध्यक्ष ॲड. के. पी. बरी, ॲड. आर. बी. पाटील, ॲड. पी. एन. पाटील, ॲड. एस. आर. पाटील, ॲड. विनोद धनगर, ॲड. संदीप वाघ यांच्यासह महसूल अधिकारी, कर्मचारी व पक्षकार मोठ्या संख्येने उपस्थित होते.
लोकअदालतीच्या माध्यमातून वाद सामोपचाराने मिटल्यामुळे पक्षकारांचा वेळ व पैशांची बचत झाली असून, अशा उपक्रमामुळे प्रलंबित महसुली प्रकरणांना गती मिळेल, असा विश्वास व्यक्त करण्यात आला.
