जळगाव प्रतिनिधी : काश्मीरच्या निसर्गरम्य खोऱ्यात आयोजित करण्यात आलेल्या पहिल्या राष्ट्रीय कराओके सिंगर्स संमेलन २०२६मध्ये महाराष्ट्राचा गौरव वाढवणारी कामगिरी जळगावचे तुषार वाघुळदे यांच्या निवडीमुळे झाली आहे. २ ते ७ ऑक्टोबरदरम्यान आयोजित या राष्ट्रीय संमेलनाच्या प्रमुख सूत्रसंचालकपदी तुषार वाघुळदे यांची निवड करण्यात आली आहे.
महाराष्ट्र चित्रपट कलाकार असोसिएशनकडून त्यांची या जबाबदारीसाठी निवड करण्यात आली आहे. उत्तर महाराष्ट्रातील नामवंत अँकर आणि कलावंत म्हणून तुषार वाघुळदे यांची ओळख आहे. राष्ट्रीय स्तरावरील विविध कार्यक्रमांमध्ये आपल्या दमदार आवाजाने, प्रभावी संवादशैलीने आणि हजरजबाबीपणाने त्यांनी सूत्रसंचालन केले आहे.
देशभरातील कराओके गायक, गायिका, संगीतकार आणि संगीत क्षेत्रातील दिग्गजांना एकत्र आणण्यासाठी या संमेलनाचे आयोजन करण्यात आले आहे. महाराष्ट्रातून या महत्त्वाच्या जबाबदारीसाठी तुषार वाघुळदे यांची निवड झाल्याने संगीत आणि कला क्षेत्रातून त्यांच्यावर अभिनंदनाचा वर्षाव होत आहे.
वाघुळदे हे मराठी फिल्म्स चेंबर्स ऑफ कॉमर्स, कोल्हापूरचे माजी सचिव तसेच अखिल भारतीय मराठी चित्रपट महामंडळाचे माजी सदस्य आहेत. ते ‘ऑर्केस्ट्रा ७ स्ट्रिंग्स’चे संचालक आणि ऑर्गनायझर म्हणूनही कार्यरत आहेत.
या निवडीबद्दल आनंद व्यक्त करताना तुषार वाघुळदे यांनी महाराष्ट्राचे प्रतिनिधित्व करण्याची संधी मिळणे अभिमानाची बाब असून, संमेलन संस्मरणीय करण्यासाठी सर्वोत्तम योगदान देणार असल्याचे सांगितले.
