जळगाव प्रतिनिधी | अजिंठा चौक परिसरातील भंगार बाजारातील पक्क्या अतिक्रमणांवर जळगाव महापालिकेने अखेर धडक कारवाई केली आहे. वारंवार सूचना देऊनही महापालिकेच्या जागेवरील अतिक्रमण कायम असल्याने प्रशासनाने दोन जेसीबीच्या सहाय्याने थेट अतिक्रमणे जमीनदोस्त करण्यास सुरुवात केली.
महापालिकेच्या जागेवर भंगार बाजारासह विविध प्रकारची पक्की बांधकामे करण्यात आल्याचे प्रशासनाच्या निदर्शनास आले होते. संबंधित दुकानदारांना यापूर्वी अतिक्रमण स्वतःहून काढून घेण्याच्या सूचना देण्यात आल्या होत्या. मात्र, या सूचनांनंतरही अतिक्रमण कायम राहिल्याने महापालिकेने कठोर पाऊल उचलले.
कारवाईसाठी महापालिकेचे अधिकारी आणि कर्मचारी मोठ्या संख्येने घटनास्थळी दाखल झाले. दोन जेसीबीच्या सहाय्याने पक्की बांधकामे पाडण्याची कारवाई सुरू करण्यात आली. दरम्यान, कायदा आणि सुव्यवस्थेचा प्रश्न निर्माण होऊ नये, यासाठी पोलिसांचा मोठा बंदोबस्त तैनात करण्यात आला होता. महावितरण कंपनीचे अधिकारी आणि कर्मचारीही कारवाईदरम्यान उपस्थित होते.
महापालिकेच्या पथकाने कारवाई सुरू करताच काही दुकानदारांनी त्याला विरोध केला. मात्र, प्रशासनाने विरोधाला न जुमानता कारवाई पुढे सुरू ठेवली. त्यामुळे परिसरात काही काळ तणावाचे वातावरण निर्माण झाले होते.
अजिंठा चौकातील भंगार बाजारावर झालेल्या या कारवाईमुळे परिसरातील अतिक्रमणधारकांमध्ये मोठी खळबळ उडाली आहे. महापालिकेच्या जागेवरील अतिक्रमणांविरोधात प्रशासनाची मोहीम आता अधिक तीव्र होण्याची शक्यता आहे. या कारवाईनंतर परिसरातील इतर अतिक्रमणांवरही महापालिका हातोडा चालवणार का, याकडे नागरिकांचे लक्ष लागले आहे.
