रावेर प्रतिनिधी | बुरहानपूरहून महाराष्ट्रात बंदी असलेला गुटखा घेऊन चोपड्याकडे जात असल्याचा संशय असलेल्या चारचाकी वाहनाला निंभोरा फाट्याजवळ अपघात झाला. या दुर्घटनेत वाहनातील दोन जण जखमी झाले आहेत. (एमएच २६ व्ही ४४२३) क्रमांकाच्या वाहनातून गुटख्याची वाहतूक केली जात असल्याची प्राथमिक माहिती समोर आली आहे.
अपघातानंतर परिसरातील नागरिकांनी घटनास्थळी धाव घेत वाहनातील दोन्ही जखमींना बाहेर काढले. रावेर शहरातील सामाजिक कार्यकर्ते शरद राजपूत यांना घटनेची माहिती मिळताच त्यांनी ॲम्बुलन्सच्या मदतीने जखमींना सावदा ग्रामीण रुग्णालयात दाखल केले. प्रकृतीनुसार पुढील उपचारासाठी दोघांना जळगाव येथील सिव्हिल हॉस्पिटलमध्ये हलविण्यात आल्याची माहिती आहे.
दरम्यान, अपघातग्रस्त वाहनाची पाहणी केली असता त्यामध्ये महाराष्ट्रात बंदी असलेला गुटखा आढळल्याचे उपस्थित नागरिकांनी सांगितले. त्यामुळे गुटखा वाहतुकीचा संशय बळावला आहे. मात्र, याबाबत अधिकृत तपासानंतरच वस्तुस्थिती स्पष्ट होणार आहे. या प्रकरणाचा स्रोत आणि वाहतुकीमागील व्यक्तींचा तपास करण्याचे आव्हान संबंधित यंत्रणेसमोर आहे.
