धरणगाव प्रतिनिधी | ‘वेंकटरमणा गोविंदा, गोविंदा’च्या जयघोषाने धरणगाव नगरी भक्तिमय झाली असताना, श्री बालाजी रथोत्सवात यंदा ऐतिहासिक क्षण अनुभवायला मिळाला. अश्विन एकादशीनिमित्त आयोजित करण्यात आलेला १०२ वर्षांची परंपरा असलेला श्री बालाजी रथोत्सव मोठ्या उत्साहात पार पडला. यंदाच्या रथोत्सवाचे सर्वांत मोठे आकर्षण म्हणजे प्रथमच महिलांना बालाजीचा रथ ओढण्याचा मान मिळाला.
वर्षानुवर्षे चालत आलेल्या या पारंपरिक रथोत्सवात महिलांना रथ ओढण्याची संधी मिळाल्याने महिला भाविकांमध्ये उत्साहाचे वातावरण पाहायला मिळाले. पारंपरिक वेशभूषेत सहभागी झालेल्या महिलांनी भक्तिभावाने रथ ओढत ‘वेंकटरमणा गोविंदा, गोविंदा’चा जयघोष केला. या अनोख्या सोहळ्यामुळे रथोत्सवाला विशेष महत्त्व प्राप्त झाले.
बालाजी महाराजांच्या दर्शनासाठी आणि रथोत्सवातील या ऐतिहासिक क्षणाचे साक्षीदार होण्यासाठी भाविकांनी मोठी गर्दी केली होती. जयघोष, भक्तिगीते आणि उत्साही वातावरणामुळे संपूर्ण परिसर भक्तिरसात न्हाऊन निघाला.
या रथोत्सवाला पालकमंत्री गुलाबराव पाटील, खासदार स्मिता वाघ यांच्यासह विविध पदाधिकारी उपस्थित होते. मान्यवरांच्या उपस्थितीत पार पडलेल्या या सोहळ्याने धरणगावच्या धार्मिक आणि सांस्कृतिक परंपरेचे दर्शन घडवले.
१०२ वर्षांची परंपरा जपत महिलांना प्रथमच रथ ओढण्याचा मिळालेला मान हा यंदाच्या रथोत्सवाचा अविस्मरणीय क्षण ठरला. भक्ती, परंपरा आणि महिलांचा सहभाग यांचा सुंदर संगम घडवणारा हा बालाजी रथोत्सव धरणगावकरांच्या स्मरणात राहणार आहे.
