भारताच्या प्रगतीमध्ये महाराष्ट्राचे दमदार पाऊल !फडणवीसांकडून कौतुक
मुख्यमंत्री देवेंद्र फडणवीस यांनी नुकतेच सांगितले की, भारतीय अर्थव्यवस्थेच्या गतीला तंत्रज्ञान आणि उत्पादन क्षेत्राने बळ दिले आहे. नवीन तंत्रज्ञानामुळे उत्पादन क्षेत्रात क्रांती घडत आहे, ज्यामुळे पुढील वाटचालीस दिशा मिळेल. फडणवीस यांनी महाराष्ट्राचे कौतुक करताना म्हटले की, भारताच्या या प्रगतीमध्ये महाराष्ट्र दमदार पाऊल टाकत आहे.
गेल्या वर्षी दावोस येथे महाराष्ट्राने सोळा लाख कोटी रुपयांचे करार केले होते, त्यापैकी पंचाहत्तर टक्के करार सक्रिय झाले आहेत आणि ते परिपूर्णतेकडे वाटचाल करत आहेत. यातीलच एक महत्त्वाचा करार श्री. भरत गीते आणि मिस्टर लोथार यांच्यासोबत केला होता, ज्याचे प्रत्यक्ष उद्घाटन आज करण्यात आले. टीका करणाऱ्यांना शब्दांनी नाही, तर कृतीने उत्तर द्यावे लागते आणि आजचा हा उद्योग त्याच कृतीचे उदाहरण आहे, असे फडणवीस यांनी नमूद केले. या उद्योगामुळे परकीय थेट गुंतवणूक (एफडीआय) आणि तंत्रज्ञान दोन्ही एकाच वेळी महाराष्ट्रात आले आहेत.
महाराष्ट्राची औद्योगिक प्रगती यापूर्वी मुंबई, एमएमआर आणि पुणे या क्षेत्रांपुरती मर्यादित होती. ही प्रगती विकेंद्रित करून राज्याच्या सर्व भागांमध्ये पोहोचावी यासाठी सरकारने प्रयत्न केले आहेत. प्रत्येक भागात नवीन औद्योगिक केंद्रे (इंडस्ट्रियल मॅग्नेट) तयार करण्याचे उद्दिष्ट आहे. सुपे एमआयडीसी आणि उत्तर महाराष्ट्रातील पाचही जिल्ह्यांमध्ये यशस्वीपणे गुंतवणूक आणण्यात यश मिळाल्याचे त्यांनी सांगितले.
