जामनेर प्रतिनिधी । जामनेर शहरात विश्वासघाताची एक संतापजनक घटना समोर आली आहे. एथर शोरूममध्ये कार्यरत असलेल्या एका कर्मचाऱ्यानेच शोरूममधील लॉकर फोडून १ लाख ६८ हजार रुपयांची रोकड चोरल्याचा प्रकार उघडकीस आला आहे. या घटनेने स्थानिक व्यापारी वर्गात मोठी खळबळ उडाली आहे.
मिळालेल्या माहितीनुसार, एथर शोरूमचे मॅनेजर दीपक नितीन मोरे यांनी यासंदर्भात पोलीस तक्रार दाखल केली आहे. २० एप्रिल रोजी शोरूमचे कामकाज आटोपून सर्व कर्मचारी घरी गेले होते. याच संधीचा फायदा घेत शोरूममधील हाऊस कीपिंग कर्मचारी महेश राजेंद्र देवरे याने रात्री शोरूममध्ये शिरून चोरी केली. त्याने लॉकरमधील ५०० रुपयांच्या ३३६ नोटा, म्हणजेच १ लाख ६८ हजार रुपये चोरले.
दुसऱ्या दिवशी सकाळी चोरीचा प्रकार उघडकीस आल्यानंतर मॅनेजर मोरे यांनी तात्काळ पोलिसांना पाचारण केले. याप्रकरणी जामनेर पोलीस स्टेशनमध्ये आरोपी महेश देवरे विरुद्ध गुन्हा दाखल करण्यात आला आहे. पोलीस उपनिरीक्षक अशोक कोकाटे अधिक तपास करत आहेत.
