जळगाव प्रतिनिधी | जळगाव शहर वाहतूक शाखेच्या वतीने रस्ता सुरक्षा अभियानांतर्गत शुक्रवारी, २४ एप्रिल रोजी रात्री शहरात ठिकठिकाणी व्यापक नाकाबंदी करण्यात आली. सायंकाळी ७ ते रात्री ११ या वेळेत राबवण्यात आलेल्या या विशेष मोहिमेत वाहतूक नियमांचे उल्लंघन करणाऱ्या शेकडो वाहनधारकांवर कारवाई करण्यात आली असून मोठा दंड वसूल करण्यात आला आहे.
वाहतूक नियमांचे उल्लंघन करणाऱ्यांवर वचक
शहरातील मुख्य चौक आणि संवेदनशील ठिकाणी पोलिसांनी ही नाकाबंदी लावली होती. यामध्ये प्रामुख्याने कर्णकर्कश आवाज करणारे ‘सायलेन्सर’, फॅन्सी नंबर प्लेट्स, विना हेल्मेट दुचाकी चालवणे, ड्रायव्हिंग लायसन्स नसणे आणि सिग्नल तोडणाऱ्या वाहनधारकांना पोलिसांनी लक्ष्य केले.मोटार वाहन कायद्यानुसार या सर्वांवर दंडात्मक कारवाई करून कायदेशीर समज देण्यात आली.
टवाळखोरांना चाप आणि मद्यपींवर कारवाई
रस्ता सुरक्षेसोबतच शहरातील कायदा व सुव्यवस्था राखण्यासाठी पोलिसांनी ही मोहीम अधिक तीव्र केली होती. रात्रीच्या वेळी विनाकारण रस्त्यावर रेंगाळणारे टवाळखोर, दारू पिऊन वाहन चालवणारे आणि सार्वजनिक ठिकाणी चर्चा करत बसलेल्या तरुणांची चौकशी करण्यात आली. मद्यपान करून गाडी चालवणाऱ्यांवर कठोर कारवाई करत त्यांची वाहने जप्त करण्याची प्रक्रिया राबवण्यात आली.
संशयास्पद हालचालींवर पोलिसांची नजर
या मोहिमेत दुचाकी आणि चारचाकी वाहनांची कसून तपासणी करण्यात आली. ज्या तरुणांच्या हालचाली संशयास्पद आढळल्या, त्यांना ताब्यात घेऊन त्यांची चौकशी करण्यात आली. रस्ता सुरक्षेबाबत नागरिकांमध्ये जागृती निर्माण करणे आणि गुन्हेगारी प्रवृत्तीला आळा घालणे हा या मोहिमेचा मुख्य उद्देश असल्याचे वाहतूक शाखेच्या वतीने सांगण्यात आले.
पोलिसांच्या या अचानक राबवण्यात आलेल्या ‘नाईट ऑपरेशन’मुळे नियम मोडणाऱ्या वाहनधारकांचे धाबे दणाणले होते. यापुढेही अशा प्रकारची कारवाई सुरूच राहणार असल्याचे संकेत प्रशासनाने दिले आहेत.
