जळगाव प्रतिनिधी | जळगाव शहराचे शैक्षणिक केंद्र असलेल्या आणि विद्यार्थ्यांची सर्वाधिक वर्दळ असलेल्या एम. जे. कॉलेज परिसरातील तीन कॅफेवर आज पोलिसांनी अचानक धाड टाकून मोठी कारवाई केली. या धडक मोहिमेमुळे कॉलेज परिसरात मोठी खळबळ उडाली असून, नियमांचे उल्लंघन करणाऱ्या इतर कॅफे चालकांमध्येही भीतीचे वातावरण पसरले आहे.
जळगाव जिल्ह्याचे पोलीस अधीक्षक श्रीकांत धिवरे यांना एम. जे. कॉलेज परिसरातील काही कॅफेमध्ये गैरप्रकार आणि नियमांचे उल्लंघन होत असल्याची माहिती मिळाली होती. या माहितीची गंभीर दखल घेत त्यांनी तातडीने कारवाईचे आदेश दिले. त्यानुसार उपविभागीय पोलीस अधिकारी नितीन गणापुरे यांच्या मार्गदर्शनाखाली एक विशेष पथक तयार करण्यात आले. या पथकात पोलीस कर्मचारी अवेश शेख, प्रणय पवार आणि अमोल ठाकूर यांचा समावेश होता.
या मोहिमेचे मुख्य वैशिष्ट्य म्हणजे यात महिलांच्या सुरक्षेसाठी कार्यरत असलेले ‘दामिनी पथक’ देखील सहभागी झाले होते. विशेषतः कॅफेमध्ये असणारे ‘कपल बॉक्स’ आणि तिथे चालणारे संशयास्पद प्रकार रोखण्यासाठी दामिनी पथकाकडून कडक तपासणी करण्यात आली. मुलींची छेडछाड थांबवणे आणि कॉलेज परिसरातील वातावरण सुरक्षित ठेवणे हा यामागचा मुख्य उद्देश होता.
पोलिसांनी या तीनही कॅफेंची कसून झडती घेतली. यावेळी नियमावलीचे पालन न करणाऱ्यांवर कडक ताशेरे ओढण्यात आले. महाविद्यालयीन परिसरात शांतता आणि सुव्यवस्था राखण्यासाठी पोलीस दल सतर्क असल्याचे या कारवाईतून स्पष्ट झाले आहे. पोलिसांनी संबंधित कॅफे चालकांवर कायदेशीर प्रक्रिया सुरू केली असून, आगामी काळातही अशा प्रकारच्या मोहिमा सुरूच राहतील, असा इशारा पोलीस प्रशासनाकडून देण्यात आला आहे.
