जळगाव प्रतिनिधी | विधानपरिषद निवडणुकीच्या पार्श्वभूमीवर जळगाव जिल्ह्यातील राजकीय वातावरण कमालीचे तापले असून, अखेर भारतीय जनता पार्टीच्या गोटातून अत्यंत महत्त्वाची बातमी समोर येत आहे. गेल्या अनेक दिवसांपासून भाजपच्या वतीने अधिकृत उमेदवाराची घोषणा कधी होणार, याकडे संपूर्ण जिल्ह्याचे लक्ष लागून राहिले होते. अनेक नावांची चर्चा सुरू असतानाही पक्षाकडून कोणताही अंतिम निर्णय जाहीर न झाल्यामुळे कार्यकर्त्यांमध्ये कमालीची उत्सुकता आणि धाकधूक वाढली होती.
जळगाव स्थानिक स्वराज्य संस्था मतदारसंघ किंवा पक्षीय कोट्यातून भाजप कोणाला संधी देणार, याबाबत अनेक तर्कवितर्क लढवले जात होते. या उमेदवारीच्या शर्यतीत प्रामुख्याने नंदू महाजन, डॉ. केतकीताई पाटील आणि नंदू आडवाणी यांच्या नावांची जोरदार चर्चा सुरू होती. हे तिन्ही उमेदवार आपापल्या क्षेत्रात आणि पक्षात वजन राखून असल्याने पक्षश्रेष्ठी कोणाच्या नावावर शिक्कामोर्तब करतात, याकडे सर्वांच्या नजरा खिळल्या होत्या. अखेर आज रविवारी रात्री या सस्पेन्सवरून काहीसा पडदा उठताना दिसत आहे.
सूत्रांकडून मिळालेल्या ताज्या माहितीनुसार, सर्व अंतर्गत स्पर्धा आणि समीकरणांना बाजूला सारत भाजप पक्षाने नंदू महाजन यांच्या नावावर विश्वास दर्शविल्याची जोरदार चर्चा आता राजकीय वर्तुळात रंगू लागली आहे. रविवारी रात्री उशिरा महाजन यांच्या उमेदवारीचे संकेत मिळताच समर्थकांमध्ये उत्साहाचे वातावरण निर्माण झाले आहे. अद्याप पक्षाकडून अधिकृत आणि अंतिम घोषणा प्रलंबित असली, तरी नंदू महाजन यांचे नाव जवळपास निश्चित झाल्याचे बोलले जात आहे. महाजन यांच्या या संभाव्य उमेदवारीमुळे आता जळगाव जिल्ह्यातील राजकीय गणिते कशी बदलतात आणि विरोधी पक्ष यावर काय रणनीती आखतो, हे पाहणे येणाऱ्या काळात रंजक ठरणार आहे.
