जळगाव प्रतिनिधी | जळगाव शहरातील वाढत्या गुन्हेगारीला आळा घालण्यासाठी जळगाव पोलिसांनी आज पहाटे विशेष कोंबिंग ऑपरेशन राबवत मोठी कारवाई केली. पहाटे ३ ते सकाळी ६ या वेळेत झालेल्या या मोहिमेत विविध गंभीर गुन्ह्यांमध्ये सहभागी असलेल्या १२५ हून अधिक सराईत गुन्हेगारांना ताब्यात घेण्यात आले.
गेल्या काही दिवसांपासून जळगाव शहरात चोरी, मारहाण, दरोडा, खंडणी तसेच इतर गंभीर स्वरूपाच्या गुन्ह्यांच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले होते. या पार्श्वभूमीवर गुन्हेगारांमध्ये पोलिसांचा धाक निर्माण करण्यासाठी आणि शहरातील कायदा व सुव्यवस्था अधिक बळकट करण्याच्या उद्देशाने जळगाव पोलिसांनी नियोजनबद्ध पद्धतीने कोंबिंग ऑपरेशन हाती घेतले.
या कारवाईदरम्यान पोलिसांच्या विविध पथकांनी शहरातील संवेदनशील भागांमध्ये एकाच वेळी छापेमारी करून अनेक अट्टल गुन्हेगारांना ताब्यात घेतले. या मोहिमेमुळे गुन्हेगारी प्रवृत्तीच्या व्यक्तींमध्ये चांगलाच धाक निर्माण झाला असून, शहरातील गुन्हेगारीवर प्रभावी नियंत्रण मिळविण्यास मदत होणार असल्याचा विश्वास पोलिस प्रशासनाने व्यक्त केला आहे.
पोलिसांच्या या धडक कारवाईचे नागरिकांकडून स्वागत करण्यात येत असून, अशा प्रकारच्या सातत्यपूर्ण मोहिमा राबविल्यास गुन्हेगारीवर अधिक प्रभावीपणे नियंत्रण मिळविता येईल, अशी अपेक्षा व्यक्त केली जात आहे. शहरात शांतता आणि सुरक्षिततेचे वातावरण कायम राखण्यासाठी पोलिसांकडून पुढील काळातही अशा विशेष मोहिमा सुरू राहणार असल्याचे संकेत मिळत आहेत.
