पाचोरा प्रतिनिधी | पाचोरा शहरातील लक्ष्मीआंगन कॉलनी परिसरात ऑनलाइन पार्सल देण्याचा बहाणा करून घरात घुसत महिलेसह तिच्या मुलांना नकली पिस्तुलाचा धाक दाखवून जबरी चोरी करणाऱ्या तिघा आरोपींना पाचोरा पोलिसांनी अवघ्या काही दिवसांत अटक केली आहे. आरोपींकडून चोरीस गेलेले ७ हजार ७०० रुपये आणि गुन्ह्यात वापरण्यात आलेले नकली पिस्तूलही जप्त करण्यात आले आहे.
पोलिसांनी दिलेल्या माहितीनुसार, १२ जून रोजी दुपारी साडेतीनच्या सुमारास चेतन उर्फ जितू प्रभाकर भुतेकर व त्याच्या दोन साथीदारांनी कुसुम एकनाथ मोकळे (रा. लक्ष्मीआंगन कॉलनी, पाचोरा) यांच्या घरी अमेझॉनचे पार्सल आल्याचे सांगत प्रवेश केला. घरात शिरल्यानंतर एका आरोपीने कुसुम मोकळे व त्यांच्या दोन मुली आणि मुलाला एका ठिकाणी बसवून नकली पिस्तुलाचा धाक दाखवला. त्यानंतर घरातील सोन्याचे दागिने मागितले. कपाटातील सामानाची उचकापाचक करत आरोपींनी कपाटातील ७ हजार रुपये रोख आणि मुलाच्या गल्ल्यातील ७०० रुपये असा एकूण ७ हजार ७०० रुपयांचा ऐवज घेऊन घटनास्थळावरून पलायन केले.
या प्रकरणी पाचोरा पोलीस ठाण्यात जबरी चोरीचा गुन्हा दाखल करण्यात आला होता. तपासादरम्यान पोलिसांनी चेतन उर्फ जितू प्रभाकर भुतेकर (रा. सातगाव-डोंगरी, ता. पाचोरा) याला अटक केली. चौकशीत त्याचा मामा गोकुळ महादू वाघ (पाटील) तसेच योगेश परशराम शिंदे (रा. सातपूर, नाशिक) यांचा गुन्ह्यात सहभाग उघड झाला. योगेश शिंदे याच्याकडून चोरीची रक्कम व गुन्ह्यात वापरलेले नकली पिस्तूल जप्त करण्यात आले.
ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी बापू रोहम यांच्या मार्गदर्शनाखाली प्रभारी पोलीस निरीक्षक राहुलकुमार पवार, पोलीस उपनिरीक्षक कृष्णा घायाळ तसेच त्यांच्या पथकाने केली. या प्रकरणाचा पुढील तपास सुरू आहे.
