भुसावळ (प्रतिनिधी) | “योग: कर्मसु कौशलम्” हा संदेश डोळ्यांसमोर ठेवून २१ जून रोजी आंतरराष्ट्रीय जागतिक योग दिनानिमित्त जळगाव जिल्हा पोलीस दलाच्या भुसावळ उपविभागातर्फे विशेष योग शिबिराचे आयोजन करण्यात आले होते. जळगावच्या माननीय पोलीस अधीक्षकांच्या मार्गदर्शनाखाली भुसावळ येथील शहर वाहतूक शाखा येथे सकाळी ६ ते ८ या वेळेत हे शिबिर अत्यंत उत्साहात आणि शिस्तबद्ध वातावरणात पार पडले.
या विशेष प्रसंगी भुसावळ उपविभागीय पोलीस अधिकारी केदार बारबोले, पोलीस निरीक्षक महेश गायकवाड आणि पोलीस निरीक्षक राहुल वाघ प्रामुख्याने उपस्थित होते. मान्यवरांच्या हस्ते या शिबिराची अधिकृत सुरुवात करण्यात आली. ‘महाराष्ट्र राज्य योग शिक्षक संघ, भुसावळ’ यांच्या सहकार्याने आयोजित या शिबिरात नामांकित योग प्रशिक्षक श्री. यश प्रसाद आंबेकर आणि डॉक्टर राधा प्रसाद आंबेकर यांनी उपस्थित पोलीस बांधवांना मार्गदर्शन केले.
तज्ज्ञ प्रशिक्षकांनी दैनंदिन पोलीस कर्तव्य बजावताना येणाऱ्या मानसिक व शारीरिक ताणतणावाचे व्यवस्थापन करण्यासाठी योग साधना कशी जीवनशैलीचा भाग बनवता येईल, यावर विशेष भर दिला. त्यांनी योगासने, प्राणायाम, ध्यान आणि तणावमुक्तीसाठी उपयुक्त असणाऱ्या विविध योगक्रियांचे प्रात्यक्षिकांसह सविस्तर प्रशिक्षण दिले.
या शिबिरासाठी भुसावळ उपविभागांतर्गत येणाऱ्या भुसावळ शहर, भुसावळ बाजारपेठ, भुसावळ तालुका पोलीस स्टेशन आणि शहर वाहतूक शाखेचे अधिकारी तसेच पोलीस अंमलदार मोठ्या संख्येने उपस्थित होते. सर्वांनी अत्यंत उत्साहाने व शिस्तीत सर्व योगासने पूर्ण केली. पोलीस दलातील प्रत्येक घटकाचे आरोग्य सुदृढ राहावे आणि कार्यक्षमता वाढीस लागावी, या उद्देशाने राबवण्यात आलेले हे योग शिबिर वरिष्ठ अधिकाऱ्यांच्या उपस्थितीत अत्यंत यशस्वीरित्या संपन्न झाले.
