जळगाव प्रतिनिधी | गैरप्रकाराच्या पार्श्वभूमीवर रद्द करण्यात आलेल्या परीक्षेची फेरपरीक्षा रविवारी देशभरासह जळगाव जिल्ह्यात शांततेत आणि कडेकोट बंदोबस्तात सुरू झाली. जिल्ह्यातील १२ परीक्षा केंद्रांवर एकूण ४ हजार ७१६ विद्यार्थी ही परीक्षा देत आहेत. परीक्षेची प्रक्रिया पारदर्शक आणि सुरळीत पार पडावी यासाठी प्रशासनाने व्यापक नियोजन केले आहे.
यापूर्वी झालेल्या परीक्षेत गैरप्रकार उघडकीस आल्यानंतर परीक्षा रद्द करण्याचा निर्णय घेण्यात आला होता. त्यामुळे प्रामाणिकपणे अभ्यास करणाऱ्या विद्यार्थ्यांना पुन्हा परीक्षा द्यावी लागत असल्याने त्यांच्यासह पालकांमध्ये नाराजी व्यक्त करण्यात आली होती. मात्र, फेरपरीक्षा कोणत्याही अडथळ्याविना पार पडावी यासाठी प्रशासनाने सर्व आवश्यक उपाययोजना केल्या आहेत.
परीक्षेसाठी विद्यार्थ्यांना दुपारी १.३० वाजेपर्यंतच परीक्षा केंद्रात प्रवेश देण्यात आला असून त्यानंतर कोणालाही प्रवेश दिला जाणार नाही, असे स्पष्ट करण्यात आले आहे. त्यामुळे विद्यार्थ्यांनी वेळेआधीच केंद्रावर पोहोचण्याचे आवाहन करण्यात आले होते.
राज्याच्या विविध भागांतून जळगावात येणाऱ्या विद्यार्थ्यांची गैरसोय होऊ नये म्हणून रेल्वे स्थानक आणि बसस्थानकावर विशेष मदत केंद्रे सुरू करण्यात आली आहेत. तसेच परीक्षा केंद्रांवर विद्यार्थ्यांची ओळखपत्रांसह कसून तपासणी करूनच प्रवेश दिला जात आहे.
दरम्यान, सर्व परीक्षा केंद्रांवर कडेकोट पोलीस बंदोबस्त तैनात करण्यात आला असून परीक्षेदरम्यान कोणताही गैरप्रकार होऊ नये यासाठी प्रशासन सतर्क आहे. शांत, सुरक्षित आणि पारदर्शक वातावरणात परीक्षा पार पाडण्यावर प्रशासनाचा भर असून संपूर्ण प्रक्रियेवर अधिकाऱ्यांकडून बारकाईने लक्ष ठेवण्यात येत आहे.
