अमळनेर प्रतिनिधी | दरवर्षीप्रमाणे यंदाही आंतरराष्ट्रीय योग दिनाचे औचित्य साधून येथील प्रसिद्ध मंगळग्रह सेवा संस्था संचलित श्री मंगळग्रह मंदिर परिसरात रविवार, २१ जून रोजी सकाळी ७ ते १० या वेळेत विशेष योग शिबिराचे आयोजन करण्यात आले होते. सकाळच्या प्रसन्न आणि पवित्र वातावरणात पार पडलेल्या या उपक्रमात मंगळग्रह सेवा संस्थेचे विश्वस्त मंडळ, मंगल सेवेकरी तसेच मंदिराच्या सेवेकऱ्यांनी मोठ्या संख्येने आणि उत्स्फूर्तपणे सहभाग नोंदवला. या शिबिरामुळे उपस्थितांमध्ये आरोग्याबाबत मोठी जनजागृती झाली.
शिबिराची सुरुवात सामूहिक योग प्रार्थनेने झाली. त्यानंतर योग मार्गदर्शक तथा संस्थेचे सहसचिव दिलीप बहिरम आणि खजिनदार गिरीश कुलकर्णी यांनी उपस्थित सर्वांना विविध योगासने, प्राणायाम, ध्यानधारणा आणि श्वसनक्रियांचे अचूक प्रात्यक्षिक करून दाखविले. यावेळी सहभागी सर्वांनी ताडासन, वृक्षासन, भुजंगासन, वज्रासन तसेच अनुलोम-विलोम आणि कपालभाती यांसारख्या विविध योगप्रकारांचा उत्साहाने सराव केला.
या प्रसंगी मार्गदर्शन करताना दिलीप बहिरम म्हणाले की, “योग ही केवळ एक व्यायाम पद्धती नसून शरीर, मन आणि आत्मा यांचा समतोल साधणारी जीवनशैली आहे. आधुनिक धावपळीच्या आणि ताणतणावाच्या युगात आरोग्यपूर्ण जीवनासाठी योग हा अत्यंत प्रभावी उपाय आहे.” तर खजिनदार गिरीश कुलकर्णी यांनी योगाचे वैद्यकीय फायदे विशद करताना सांगितले की, नियमित योगाभ्यासामुळे रक्ताभिसरण सुधारते, स्नायू बळकट होतात आणि मधुमेह, उच्च रक्तदाब व हृदयविकार यांसारख्या आजारांचा धोका कमी होतो. प्राणायामामुळे मानसिक शांतता लाभून सकारात्मकता वाढते.
शेवटी, उपस्थित मान्यवरांनी आंतरराष्ट्रीय योग दिनाचे महत्त्व अधोरेखित करत प्रत्येकाने योगाला आपल्या दैनंदिन जीवनाचा अविभाज्य भाग बनविण्याचे आवाहन केले. योगाच्या माध्यमातूनच निरोगी समाज आणि सशक्त राष्ट्र उभारता येईल, असा सूर या शिबिरातून उमटला.
